ప్రభుత్వానికి ప్రచారం సరిపోవడం లేదు. తమ పథకాల గురించి చెప్పడానికి ఇంకో చానల్ కావాలని అనుకుంటున్నారు. ఇప్పటికే అనధికారికంగా సాక్షి ప్రభుత్వ చానల్‌గా ఉంది. ఇక అత్యధిక రేటింగ్‌లు ఉన్న రెండు ప్రధాన చానళ్లు చేసే పని కూడా అదే. సాక్షి 2, సాక్షి 3 అని టీడీపీ నేతలు వాటిని విమర్శిస్తూ ఉంటారు. ఆ ప్రచారం అంతా సరిపోవడం లేదనుకున్నారేమో కానీ కొత్తగా ప్రభుత్వమే న్యూస్ చానల్ పెట్టాలని నిర్ణయించుకుంది. ఫైబర్ నెట్ కార్పొరేషన్ ఆధ్వర్యంలో ఈ టీవీ చానల్ ఏర్పాటు చేయడానికి నిర్ణయించారు.

పైబర్ నెట్‌కు ఇటీవల గౌతంరెడ్డి అనే జగన్ బంధువును చైర్మన్‌గా నియమించారు. టెక్నికల్‌గా ఏమీ తెలియని గౌతంరెడ్డి … ఆధ్వర్యంలో ఇప్పుడు ఫైబర్‌నెట్ నడుస్తోంది. ప్రచారం సరిపోవడం లేదనుకున్న ప్రభుత్వానికి ఫైబర్ నెట్ ద్వారా . చానల్ పెడితే ఎలా ఉంటుందన్న ఆలోచన కలిగింది. వెంటనే.. గౌతంరెడ్డి మిగతా పనులను ముందుకు తీసుకెళ్తున్నారు. త్వరలోనే ప్రారంభిస్తామని చెబుతున్నారు. ఇది పూర్తిగా న్యూస్ చానల్ తరహాలోనే ఉంటుంది. రెగ్యూలర్ న్యూస్ చానల్ తరహాలోనే పని చేస్తుందని చెబుతున్నారు.

ఎన్నికలకు ముందే ప్రారంభిస్తారు. అందులో సిబ్బంది.. సాక్షి నుంచే ఎక్కువ మంది వస్తారు. అదంతా కామన్. గత ఎన్నికల తర్వాత సాక్షిలో భారంగా మారిన వారందరికీ ప్రభుత్వంలో ఔట్ సోర్సింగ్ పనులు ఇచ్చారు. ఇప్పుడు వారందరికీ ఆ చానల్‌లో ఉద్యోగాలు ఇచ్చే అవకాశం ఉంది. కొత్త ప్రభుత్వం వచ్చినా వాళ్ల ఉద్యోగాలకు గ్యారంటీ ఇస్తారని చెబుతున్నారు. అటు ప్రచారానికి ప్రచారం.. ఇటు తమ వాళ్ల కు భద్రత ఇచ్చినట్లుగా ఉంటుందనే ఆలోచన చేస్తున్నట్లుగా తెలుస్తోంది. మొత్తానికి ప్రజల సొమ్ముకు మరో రకంగా టెండర్ వేస్తున్నట్లుగా స్పష్టమవుతోంది.