ఢిల్లీ ఎన్నికల్లో ఎన్డీఏ తరపున ప్రచారం చేసేందుకు టీడీపీ అధినేత, సీఎం చంద్రబాబు ఒకటో తేదీన ఢిల్లీకి వెళ్లనున్నారు. ఆయన ప్రచార షెడ్యూల్ ఖరారు అయింది. అయితే మరో స్టార్ క్యాంపెయినర్ పవన్ కల్యాణ్ షెడ్యూల్ ఇంకా ఖరారు కాలేదు. పవన్ స్టార్ గా.. హిందూత్వ వాదంతో ఇటీవలి కాలంలో ఆయన మంచి గుర్తింపు తెచ్చుకున్నారు. మహారాష్ట్ర ఎన్నికల్లో ప్రచారంతో బీజేపీ పెద్దలకూ ఆయనపై మంచి నమ్మకం ఏర్పడింది.
ఢిల్లీలో అన్ని రాష్ట్ర ప్రజలు ఉంటారు. ఉత్తరాది వారితో పోలిస్తే దక్షిణాది వారు కాస్త తక్కువే. అయినాచాలా నియోజకవర్గాల్లో గెలుపోటములు నిర్ణయించే స్థితిలో ఉంటారు. వారిని ఆకట్టుకోవడానికి తెలుగు నేతల్ని .. ఇతర రాష్ట్రాల నేతల్ని కూడా బీజేపీ రంగంలోకి దింపుతోంది. ఈ క్రమంలో పవన్ కూడా ప్రచారంలో విస్తృతంగా ప్రచారంలో పాల్గొంటారని చెబుతూ వచ్చారు. అయితే ఎన్నికల ప్రచార గడువు ముగుస్తున్న పవన్ ప్రచార తేదీలు ఇంకా ఖరారు కాలేదు.
ఐదో తేదీన ఢిల్లీ ఎన్నికల పోలింగ్ జరుగుతుంది. మూడో తేదీన ప్రచారం ఆఖరు. ఆ రోజున సాయంత్రం ఐదుగంటలకే ముగించాలి కాబట్టి.. రెండో తేదీ లోపే పవన్ కల్యాణ్ ప్రచారం చేయాల్సి ఉంది. ఏ రోజున.. ఏ ఏ చోట్ల ప్రచారం చేయాలన్నది బీజేపీ హైకమాండ్ ఖరారు చేసి సమాచారం ఇచ్చే అవకాశాలు ఉన్నట్లుగా తెలుస్తోంది.
