కోర్టు నోటీసులు జారీ చేస్తే వాట్సాపులోనో.. పోస్టులోనో.. లేకపోతే మరో పద్దతిలోనేపంపుతారు. కానీ సీఎం జగన్, ఆయన భార్య భారతి రెడ్డికి ఢిల్లీ హైకోర్టు సిబ్బంది ప్రత్యేకంగా వచ్చి నోటీసులు ఇచ్చారు. అందినట్లుగా సంతకాలు పెట్టించుకున్నారు. ఈ వ్యవహారం ఇప్పుడు కలకలం రేపుతోంది. సాక్షి పత్రికకు ఎండీగా భారతి రెడ్డి ఉన్నారు. ప్రజాధనాన్ని సాక్షి పత్రికకు దోచిపెడుతున్నారని వాలంటీర్లకు కొనుగోలు కోసం ఇస్తున్నారని గతంలో హైకోర్టులో ఈనాడు పిటిషన్ వేసింది.

హైకోర్టు కొట్టి వేయడంతో సుప్రీంకోర్టుకు వెళ్లారు. సుప్రీం కోర్టు విచారణను ఢిల్లీ హైకోర్టుకు బదలాయించింది. విచారణ జరిపిన ఢిల్లీ హైకోర్టు అసలు వాలంటీర్లు అంటే ఎవరు.. ఎందుకు వారికి పేపర్‌కు డబ్బులు ఇవ్వాల్సి వస్తోంది.. వారు సాక్షిని మాత్రమే ఎందుకు కొంటున్నారు.. ఇలాంటివన్నీ బయటకు తీసేందుకు ఢిల్లీ హైకోర్టు నోటీసులు జారీ చేసింది. ప్రభుత్వ పథకాల సమాచారం కోసం ఒక దినపత్రికని కొనాలంటూ గతంలో ఏపీ ప్రభుత్వం జీవో ఇచ్చింది. ఇందుకోసం వలంటీర్లకు, సచివాలయ సిబ్బందికి ఒక్కొక్కరికి రూ.200 మంజూరు చేసింది.

ఇది పరోక్షంగా జగన్ సొంత పేపరైన సాక్షి పేపర్ సర్కులేషన్ ని పెంచడమేనంటూ ఉషోదయా పబ్లికేషన్స్ సుప్రీంకోర్టులో సవాల్ చేసింది. ఈ కేసుని ఏపీ హైకోర్టులో కాకుండా, ఢిల్లీ హైకోర్టులో విచారణ చేపట్టాలని సుప్రీం కోర్టు గతంలో ఆదేశించింది. ఇవాళ నోటీసులతో సీఎం క్యాంపు ఆఫీసుకు కోర్టు సిబ్బంది వచ్చారు. సాక్షి ఎండీగా భారతీరెడ్డికి, ఏపీ సీఎంగా జగన్‍కి కోర్టు సిబ్బంది వచ్చి నోటీసులు ఇచ్చినట్లు సమాచారం.