రీరిలీజ్ ట్రెండ్ అభిమానులకు బాగా పట్టేసింది. రీరిలీజ్ లో వచ్చే కలెక్షన్స్ ని కూడా ఫ్యాన్స్ ప్రతిష్టాత్మకంగా తీసుకుంటున్నారు. ఇటివలే రిలీజైన మహేష్ బాబు ‘మురారి’ సినిమా, కొత్త రిలీజులు కంటే ఎక్కువ ఓపెనింగ్స్ తెచ్చుకుందని ఆధారాలతో సహా చూపెడుతున్నారు ఫ్యాన్స్. అయితే రీరిలీజ్‌లపై అభిమానులకు ఉన్నంత ఉత్సాహం హీరోలకి ఉంటుందా? అనే ప్రశ్న చాలాసార్లు ఉత్పన్న‌మౌతుంటుంది. దీనికి కారణం.. రీరిలీజ్ విషయంలో అభిమానుల సందడే కానీ అభిమానులని ప్రోత్సహించే విధంగా హీరోల చొరవ సాధారణంగా కనిపించదు. మహా అయితే అభిమానులకు థాంక్స్ చెబుతూ ఓ ట్వీట్ పెడతారు. ఇటీవల మహేష్ బాబు కూడా అదే చేశారు.
Also Read : చిరు Vs బాల‌య్య… ఎవ‌రిది పై చేయి?
అయితే ఈ విషయంలో చిరంజీవి కాస్త భిన్నంగా స్పందించారు. ఆగస్ట్ 22న ‘ఇంద్ర’ రీరిలీజ్ అవుతోంది. ఇప్పటికే బుకింగ్స్ జరుగుతున్నాయి. ఇప్పటికే చాలా షోలు హౌస్‌ఫుల్ అయ్యాయి. అవుతున్నాయి. ఇలాంటి సందర్భంలో అభిమానులు ఉద్దేశించి ఒక స్పెషల్ వీడియోని విడుదల చేశారు చిరు. దాదాపు మూడు నిమిషాల నిడివి గల వీడియో ఇది. ఇంద్ర స్టయిల్ లో ఓ డైలాగ్ ని చెబుతూ ఆ సినిమా విశేషాలని పంచుకున్నారు. అభిమానుల చేసే పనులని ప్రత్యేకంగా ప్రస్థావించడం చిరంజీవికి మొదటి నుంచి అలవాటు. ఇంద్ర రీరిలీజ్ సందర్భంలో చిరు ప్రత్యేకంగా సమయాన్ని కేటాయించి ఇలాంటి వీడియోని రిలీజ్ చేయడం అభిమానులకు మరింత ఉత్సాహాన్ని ఇచ్చింది. ‘ఇంద్ర’తో పాటుగా ‘శంక‌ర్ దాదా ఎంబీబీఎస్‌’ కూడా చిరు పుట్టిన రోజు కానుక‌గా రీ రిలీజ్‌కు సిద్ధ‌మైంది.
