ప్రేమ‌మ్ సినిమాతో .. సాయి ప‌ల్ల‌వి ఫ్యాన్స్ మొద‌లైపోయారు. సాయి ప‌ల్ల‌వి తెలుగులో ఒక్క సినిమా కూడా చేయ‌క‌పోయినా.. ఆమెని అభిమానించే వాళ్లు టాలీవుడ్‌లో ఉన్నారు. ఇప్పుడు ఫిదాతో టాలీవుడ్‌లోకి ఎంట్రీ ఇస్తోంది సాయి ప‌ల్ల‌వి! అస‌లే ల‌వ్ స్టోరీ, ఆపై శేఖ‌ర్ క‌మ్ముల సినిమా. సాయి ప‌ల్ల‌వి క్యారెక్ట‌ర్ అదిరిపోవ‌డానికి ఇంకా కార‌ణాలు కావాలా?? ట్రైల‌ర్లు చూస్తుంటే.. హీరోయిన్‌డామినేష‌న్ ఏ స్థాయిలో ఉండ‌బోతోందో అర్థం అవుతోంది. తెలంగాణ యాస‌లో సాయి ప‌ల్ల‌వి డైలాగులు చెబుతోంటే… థియేట‌ర్ల వైపుకు మ‌న‌సు లాగేస్తోంద‌ప్పుడే. స‌హ‌జ‌మైన అందానికి ప్ర‌తీక అయిన సాయి ప‌ల్ల‌వి.. తెలుగు నాట మ‌రింత మంది కుర్ర అభిమానుల్ని సంపాదించుకోవ‌డం ఖాయ‌మ‌నిపిస్తోంది. శేఖ‌ర్ సినిమాలు గోదావ‌రి, ఆనంద్‌, హ్యాపీడేస్‌ల‌లో క‌థానాయిక పాత్ర‌కు చాలా ప్రాధాన్యం ఉంటుంది. ఒక విధంగా హీరోలు వాళ్లే. ఫిదాలోనూ.. సాయి ప‌ల్ల‌వికి అలాంటి పాత్రే దొరికింది. ఆనంద్‌తో క‌మ‌లిని, హ్యాపీడేస్ త‌ర‌వాత త‌మ‌న్నా.. తెలుగునాట పాపుల‌ర్ అయిపోయారు. ఆ జాబితాలో.. సాయి ప‌ల్ల‌వి కూడా చేరిపోయే అవ‌కాశాలు పుష్క‌లంగా ఉన్నాయి. ఫిదా తో సాయి ప‌ల్ల‌వి కెరీర్ టాలీవుడ్‌లో ఎలాంటి మ‌లుపు తిరుగుతుందో చూడాలి.