చిరంజీవి – కొర‌టాల శివ కాంబోలో ఓ సినిమా రూపుదిద్దుకుంటున్న సంగ‌తి తెలిసిందే. ద‌స‌రాకి ఈ చిత్రాన్ని లాంఛనంగా ప్రారంభించారు. వ‌చ్చే నెల‌లోనే షూటింగ్ మొద‌లెడ‌తారు. ఈ సినిమా కోసం హైద‌రాబాద్‌లో అప్పుడే ఓ ప్ర‌త్యేక‌మైన సెట్ కూడా వెల‌సింది. అయితే ఇప్ప‌టి వ‌ర‌కూ క‌థానాయిక ఎవ‌రన్న‌ది తేల‌లేదు. న‌య‌న‌తార, అనుష్క, శ్రుతిహాస‌న్‌, త‌మ‌న్నా… ఇలా చాలా పేర్లు వార్త‌ల్లో వినిపించాయి. ఇటీవ‌ల త్రిష పేరైతే బాగా చ‌క్క‌ర్లు కొట్టింది. త్రిష ఎంపిక దాదాపుగా ఖాయ‌మైపోయింద‌నుకున్నారు. కానీ… ఏమైందో ఏమో గానీ, త్రిష ఈ సినిమా నుంచి డ్రాప్ అయ్యింది.
ఈ విష‌యాన్ని త్రిష‌నే చెప్పింది `చిరంజీవిగారి సినిమాలో న‌టిస్తున్నాన‌న్న వార్త‌ల్లో నిజం లేదు. ఆ సినిమాలో నేను లేను. ఆ అవ‌కాశం వస్తే త‌ప్ప‌కుండా న‌టిస్తా` అంటూ పేర్కొంది. త్రిష‌తో చిత్ర‌బృందం సంప్ర‌దింపులు జ‌రిపింది. ఈ చిత్ర బృందంలోని ఓ ప్ర‌ముఖుడు ఇటీవ‌ల చెన్నై వెళ్లి త్రిష‌ని క‌లిశారు కూడా. ఈ ఆఫ‌ర్ నా వ‌ర‌కూ రాలేద‌న్న త్రిష మాట‌లో నిజం లేన‌ట్టే. కాక‌పోతే.. ఈ సినిమా చేయ‌న‌ని త్రిష చెప్పిందా, లేదంటే చిత్ర‌బృంద‌మే మ‌న‌సు మార్చుకుందా? అనేది తెలియాల్సివుంది. త్రిష ఆప్ష‌న్ కూడా ప‌క్కకు వెళ్లిపోవ‌డంతో… ఇప్పుడు ఈ సినిమాలో క‌థానాయిక ఎవ‌ర‌న్న ప్ర‌శ్న మ‌ళ్లీ ఉత్ప‌న్న‌మైంది.
