మాటల మాంత్రికుడు త్రివిక్రం శ్రీనివాస్ దర్శకత్వంలో చేయాలని ప్రతి ఒక్క స్టార్ హీరోకి ఉంటుంది. మహేష్, పవన్, అల్లు అర్జున్ లు ఆ దర్శకుడితో రెండు రెండు సినిమాలు చేశారు. ఫలితం ఎలా ఉన్నా త్రివిక్రం సినిమా అంటే ఎంతోకొంత కొత్తగా ఉంటుంది. త్రివిక్రంతో మిగతా హీరోలు చేద్దామని ఎంత ప్రయత్నిస్తున్నా అది మాత్రం కుదరట్లేదు. ప్రస్తుతం త్రివిక్రం చేస్తున్న సినిమా అ..ఆ. నితిన్, సమంత జంటగా నటిస్తున్న ఈ సినిమా సెట్స్ మీద ఉంది.
అయితే త్రివిక్రంతో ఎప్పటినుండో సినిమా చేద్దామనుకుంటున్న మెగా హీరో రామ్ చరణ్ కి మాత్రం త్రివిక్రంతో చేసే అవకాశం రావట్లేదు. బ్రూస్ లీ ఊహించని ఫలితం ఇవ్వడంతో ఏం చేయాలో తోచని పరిస్థితి అయ్యింది చెర్రిది. కోలీవుడ్ హిట్ మూవీ తని ఒరువన్ రీమేక్ చేసే ప్రయత్నంలో ఉన్నా తర్వాత సినిమా ఏంటన్నది ఇంకా సందేహంలోనే ఉన్నాడు. ఒకవేళ త్రివిక్రం ఓకే అంటే తనతో సినిమా చేద్దామనుకున్నాడు చరణ్.
కాని త్రివిక్రం చేస్తున్న అ..ఆ సినిమా అవగానే తమిళ స్టార్ హీరో సూర్యతో ఓ ద్విభాషా చిత్రాన్ని తెరకెక్కించేందుకు రంగం సిద్ధం చేసుకుంటున్నాడు. జ్ఞానవెల్ రాజా, రాధాకృష్ణ కలిసి నిర్మిస్తున్న ఈ సినిమా వచ్చే ఏడాది మొదలవుతుందని ఫిల్మ్ నగర్ టాక్. ఒకవేళ చరణ్.. త్రివిక్రంతో సినిమా చేయాలంటే సూర్య సినిమా అయ్యేదాకా వెయిట్ చేయాల్సి ఉంటుంది. మరి అప్పటిదాకా వెయిట్ చేస్తాడా లేక వేరే సినిమా చేస్తాడా అన్నది చూడాలి. చూస్తుంటే త్రివిక్రంతో ఇప్పుడప్పుడేచరణ్ సినిమా చేసే అవకాశం లేనట్టే అనిపిస్తుంది.
