సునీల్ – త్రివిక్ర‌మ్ కెరీర్‌లు ఒకేసారి మొద‌ల‌య్యాయి. ఒకేసారి విశ్వ‌రూపం దాల్చాయి. వాళ్ల ఫ్రెండ్ షిప్ సినిమా సినిమాకీ… స్ట్రాంగ్ అవుతూ వెళ్లాయి. ఓ ద‌శ‌లో సునీల్ హీరోగా, త్రివిక్ర‌మ్ ఓ సినిమా చేస్తాడ‌ని ప్ర‌చారం జ‌రిగింది. `బంతి` అనే పేరు కూడా వినిపించింది. అయితే అదేం కార్య‌రూపం దాల్చ‌లేదు. క‌మెడియ‌న్ గా సెకండ్ ఇన్నింగ్స్ మొద‌లెట్టాక‌.. త్రివిక్ర‌మ్ సినిమాల్లో మంచి క్యారెక్ట‌ర్లే ప‌డ్డాయి సునీల్ కి. అయితే అవేం ఇది వ‌ర‌క‌టి స్థాయిలో లేవన్న‌ది నిజం.

అందుకే ఇప్పుడు త‌న స్నేహితుడు సునీల్ కోసం ఓ వెరైటీ క్యారెక్ట‌ర్ ని సృష్టించాడ‌ట త్రివిక్ర‌మ్. ఎన్టీఆర్ తో మాట‌ల మాంత్రికుడు ఓ సినిమా చేస్తున్న సంగ‌తి తెలిసిందే. ఇందులో సునీల్ కి చాలా మంచి పాత్ర ప‌డింద‌ట‌. అయితే ఈసారి మాత్రం సునీల్ కామెడీ చేయ‌డు. అలాగ‌ని సీరియ‌స్ టైపు పాత్ర కూడా కాదు. ఈ రెండింటికీ అంద‌ని ఓ క్యారెక్ట‌ర్‌.. రాశాడ‌ట‌. సునీల్ ఇలాంటి పాత్ర కూడా చేయ‌గ‌ల‌డా? అనుకునేలా ఈ క్యారెక్ట‌ర్‌ని త్రివిక్ర‌మ్ తీర్చిదిద్దాడ‌ని తెలుస్తోంది. నిజానికి.. ముందు అనుకున్న స్క్రిప్టులో సునీల్ పాత్ర లేదు. లాక్ డౌన్‌లో స్క్రిప్టుని మ‌ళ్లీ రీ రైట్ చేసే వీలు ద‌క్కింది త్రివిక్ర‌మ్ కి. ఆ టైమ్ లో సునీల్ పాత్ర‌.. కొత్త వ‌చ్చి చేరింద‌ట‌. సునీల్ కెరీర్‌లో ఇదో ఛాలెంజింగ్ రోల్ అవుతుంద‌ని స‌మాచారం.