ఎన్టీఆర్ – త్రివిక్ర‌మ్ కాంబోలో ఓ సినిమా రాబోతోంద‌ని ఇది వ‌ర‌కే తెలుగు 360.కామ్ చెప్పేసింది. ఇప్పుడు ఆ క‌బురు నిజ‌మైంది. అందుకు సంబంధించిన అధికారిక ప్ర‌క‌ట‌న కూడా వ‌చ్చేసింది. ఎన్టీఆర్ క‌థానాయ‌కుడిగా హారిక హాసిని క్రియేష‌న్స్ సంస్థ ఓ చిత్రాన్ని రూపొందించ‌నుంది. త్రివిక్ర‌మ్ ద‌ర్శ‌క‌త్వం వ‌హిస్తారు. రాధా కృష్ణ నిర్మాత‌. ప్ర‌స్తుతం ఎన్టీఆర్ బాబితోనూ, త్రివిక్ర‌మ్ ప‌వ‌న్‌తోనూ ఓ సినిమా చేయ‌బోతున్నారు. ఇవి రెండూ పూర్త‌య్యాక ఈ చిత్రం సెట్స్‌పైకి వెళ్తుంది. ఆగ‌స్టు నుంచి చిత్రీక‌ర‌ణ ప్రారంభ‌మ‌య్యే అవ‌కాశాలున్నాయి. ఇప్ప‌టికే త్రివిక్ర‌మ్ వినిపించిన క‌థ‌ని ఎన్టీఆర్ ఓకే చెప్పేశాడు. స్క్రిప్టు వ‌ర్క్ కూడా దాదాపుగా పూర్తి కావొచ్చింది. ముందు ప‌వ‌న్ సినిమాపై దృష్టి నిలిపి.. ఆ త‌ర‌వాత‌.. ఎన్టీఆర్ సినిమా విష‌యానికొద్దామ‌న్న ఆలోచ‌న‌లో ఉన్నాడు త్రివిక్ర‌మ్. అయితే న్యూ ఇయ‌ర్ కానుక‌గా.. ఈ సినిమాకి సంబంధించిన ఎనౌన్స్ మెంట్ ఇవ్వాల‌ని అటు ఎన్టీఆర్ ఇటు త్రివిక్ర‌మ్ భావించ‌డంతో అధికారిక ప్ర‌క‌ట‌న వ‌చ్చేసింది. త్వ‌ర‌లోనే పూర్తి వివ‌రాలు వెల్ల‌డ‌వుతాయి.