తెలంగాణ రాష్ట్ర సమితికి గ్రేటర్ ఎన్నికల్లో తగిలిన ఎదురు దెబ్బ కంటే.. ఇప్పుడు తమ ముందు ఉన్న సిట్యుయేషన్‌ను ఎలా డీల్ చేయాలన్నది పెద్ద పజిల్‌గా మారింది. మేయర్ సీటును టీఆర్ఎస్ వదులుకోలేదు. ఎందుకంటే… గ్రేటర్‌లో అత్యధిక సీట్లు ఉన్నఅతి పెద్ద పార్టీ. అలాగే ఎక్స్ ఆఫీషియో ఓట్ల బలం కూడా ఎక్కువగా ఉంది. కానీ… అన్నీ కలిపితే.. మ్యాజిక్ మార్క్ రాదు. ఎంఐఎం మద్దతు తీసుకోవావాల్సిందే. కానీ నేరుగా ఎంఐఎం పొత్తులు పెట్టుకుంటే.. పండుగ చేసుకునేది మొట్ట మొదట బీజేపీనే. 2023నాటికి వారు ప్రమామస్వీకారానికి ఏర్పాట్లను ఇప్పటి నుండే చేసుకుంటారు.

గ్రేటర్‌లో బీజేపీ అవలంభించిన రాజకీయ వ్యూహం చూసిన తర్వాత… ఎంఐఎంతో పొత్తు పెట్టుకునేంత సాహసం కేసీఆర్ చేయకపోవచ్చంటున్నారు. నేరుగా పొత్తు పెట్టుకుంటే ఎలాంటి పరిస్థితి ఏర్పడుతుందో.. బీజేపీ నేతలకు బాగా తెలుసు. అందుకే… ప్రచారానికి వచ్చినప్పుడు… హోంమంత్రి అమిత్ షా.. కేసీఆర్‌కు సవాల్ చేశారు. తెర వెనుక సహకారం ఎందుకు .. నేరుగా పొత్తులు పెట్టుకోవాలని చాలెంజ్ చేశారు. తెలంగాణ బీజేపీ నేతలదీ అదే డిమాండ్. ఇప్పుడు.. కేసీఆర్ ముందు ఈ చిక్కు ముడి అలాగే ఉంది. అలాగని భారతీయ జనతా పార్టీ మేయర్ సీటు పొందే అవకాశం లేదు. ఆ పార్టీకి ఉన్న యాభై సీట్లతో మేయర్ సీటు రాదు. ఎంఐఎంతో పొత్తు పెట్టుకునే అవకాశం లేదు. అలాగే.. బీజేపీ, టీఆర్ఎస్ కూడా కలిసే అవకాశం లేదు. ఉన్న చాన్స్ ఒక్కటే.. అదే ఎంఐఎం, టీఆర్ఎస్ పొత్తులు పెట్టుకోవడం లేకపోతే పరోక్షంగా సహకరించుకోవడం.

మేయర్ సీటుపై టీఆర్ఎస్ కార్పొరేటర్ కూర్చునేలా.. నేరుగా పొత్తు పెట్టుకోకుండా ఎన్నిక సమయంలో ఎంఐఎం గైర్హాజర్ అవ్వొచ్చు. కానీ.. ఎంఐఎం ఎలాంటి ప్రతిఫలం లేకుండా అలాంటి పని చేయలేదు. పరోక్షంగా అయినారెండున్నరేళ్ల తర్వాత మేయర్ పదవికి ఆ పార్టీకి ఇవ్వాలంటే టీఆర్ఎస్ కూడా అలాంటి సహకరమే అందించాల్సి ఉంటుంది. కానీ నేరుగా పొత్తులు పెట్టుకోకపోయినా… ప్రజలు.. తమను మోసం చేస్తున్నారని భావిస్తే.. టీఆర్ఎస్ బేస్ కరిగిపోతుంది. అందుకే… అటు మేయర్ పీఠాన్ని వదులుకోలేరు.. ఇటు భవిష్యత్ ను పణంగా పెట్టలేరు. కేసీఆర్ పరిస్థితి ఇబ్బందికరంగా మారింది.