తెలంగాణ రాష్ట్ర సమితిలో ఇప్పుడు నాయకత్వ మార్పు చర్చ విస్తృతంగా జరుగుతోంది. కాబోయే సీఎం కేటీఆర్ అని పొగడ్తలు కురిపించడానికి పోటీ పడుతున్నారు. ఆయన గుడ్ లుక్స్‌లో పడేందుకు ఇప్పటి వరకూ పెద్దగా ప్రాధాన్య పోస్టులు పొందని టీఆర్ఎస్ నేతలు… మంత్రి అయిపోవాలనుకునే ఎమ్మెల్యేలు పోటీ పడుతున్నారు. అయితే అందరూ కాదు. కొంత మంది సైలెంట్‌గా ఉంటున్నారు. కేటీఆర్ ముఖ్యమంత్రి పదవిపై చాలా మంది సీనియర్లు ఇంకాతమ అభిప్రాయం వ్యక్తం చేయలేదు. ఈటల లాంటి ఒకరిద్దరు తప్ప… అనేక మంది తమ అభిప్రాయాల్ని బహిరంగంగా చెప్పాల్సి ఉంది. టీఆర్ఎస్ అధికారంలోకి వచ్చిన తర్వాత పార్టీలోకి వచ్చిన బీటీ బ్యాచ్‌గా పేర్కొనే బంగారు తెలంగాణ బ్యాచ్ మాత్రం.. కేటీఆర్‌కు ఫుల్ సపోర్ట్ ఇస్తోంది.
ఉద్యమంలో కేసీఆర్ వెన్నంటి నడిచిన వారు ఇంకా పూర్తిస్థాయిలో బయటకు రాలేదు. వారంతా సీనియర్లు. కేసీఆర్‌తో కలిసి పని చేసిన వారు. వారంతా.. మనస్ఫూర్తిగా కేటీఆర్ నాయకత్వాన్ని ఆహ్వానిస్తారా లేదా అన్నది ఇప్పుడు ప్రధానమైన ప్రశ్నగా మారింది. కొంత మంది అది తమ అంతర్గత విషయంగా చెబుతున్నారు. మరికొంత మంది ఇప్పటికీ నోరు మెదపడం లేదు. ముఖ్యంగా హరీష్ రావు ఇంత వరకూ స్పందించలేదు. ఆయన స్పందన కోసం.. టీఆర్ఎస్‌లోనే కాదు.. ఇతర పార్టీల నేతలూ ఎదురు చూస్తున్నారు. మామూలుగా అయితే ఉద్యమ కాలం నుంచి… అధికారంలోకి వచ్చే వరకూ వెన్నుముకగా నిలిచిన నేత హరీష్ రావు. ఆయనకు పార్టీలో ఓ ప్రత్యేకమైన మద్దతుదారులైన వర్గం ఉంది. వారంతా ప్రస్తుత పరిస్థితుల కారణంగా బయటపడలేకపోవచ్చు కానీ.. సందర్భం వస్తే.. అంతా హరీష్ వైపే చేరుతారని టీఆర్ఎస్‌లో అందరికీ తెలుసు.
అందుకే ఇప్పుడు హరీష్ రావు.. కేటీఆర్ ముఖ్యమంత్రి అయితే.. ఆయన కేబినెట్‌లో చేస్తారా… మనస్ఫూర్తిగా అంగీకరిస్తారా అన్న డౌట్ ఉంది. అలాగే.. అసలు హరీష్‌కు కేటీఆర్ కేబినెట్‌లో చోటు దక్కకపోతే పరిస్థితి ఏంటి అన్న చర్చ కూడా నడుస్తోంది. హరీష్‌తో పాటు మరికొంత మంది సీనియర్ నేతల స్పందన బయటకు రావాల్సి ఉంది. మొహమాటానికి కాకుండా… కేటీఆర్‌కు అందరూ మనస్ఫూర్తిగా మద్దతిస్తే.. కేసీఆర్ ఓ భారీ సవాల్‌ను అధిగమించినట్లే అనుకోవచ్చు.
