అమెరికా అధ్యక్ష ఎన్నికలు హోరాహోరీ అంటే ఏమిటో నిరూపిస్తున్నాయి. ఎవరికి మేజిక్ మార్క్ దక్కుతుందో అంచనా వేయడం కష్టంగా మారుతోంది. కీలకమైన ఏడు రాష్ట్రాల్లో ఇంకా ఓట్ల లెక్కింపు జరుగుతోంది. మిగతా 43 రాష్ట్రాల్లో లెక్కింపు పూర్తయింది. అప్పటికి బిడెన్ 238 ఎలక్టోరల్ ఓట్లు సాధించగా.. ట్రంప్ స్కోర్ 213 దగ్గర ఉంది. అయితే కౌంటింగ్ జరుగుతున్న ఏడు రాష్ట్రాల్లో నాలుగు రాష్ట్రాల్లో ట్రంప్ ఆధిక్యత చూపిస్తున్నారు. మూడు రాష్ట్రాల్లో బిడెన్ ఆధిక్యత చూపిస్తున్నారు. ఎవరి వైపు ఓట్లు మొగ్గుతాయో అంచనా వేయడం కష్టంగా మారింది. 

ఇప్పటికే 238 ఎలక్టోరల్ ఓట్లు సాధించిన బిడెన్.. మరో 32 ఓట్లు పొందితే  అగ్రజుడైపోతాడు. దానికి ఆయనకు స్కోప్ ఉంది. నెవడా, విన్ కాన్సిన్, మిచిగాన్ రాష్ట్రాల్లో బిడెన్ ఆధిక్యతలో కొనసాగుతున్నారు. కానీ ఆయన అధిక్యత స్వల్పమే.. ఒక శాతం.. రెండు శాతం మధ్య ఊగిసలాడుతోంది.   నెవడా, విన్ కాన్సిన్, మిచిగాన్ రాష్ట్రాల్లో గెలిస్తే.. బిడెన్‌కు కావాల్సిన 32 ఎలక్టోరల్ ఓట్లు వచ్చేస్తాయి. 

ట్రంప్‌కు ప్రస్తుతం 213 ఎలక్టోరల్ ఓట్లు ఉన్నాయి. ఆయన మళ్లీ అధ్యక్షుడవ్వాలంటే.. 57 ఎలక్టోరల్ ఓట్లు కావాలి. పెన్సిల్వేనియా, నార్త్ కరోలినా, జార్జియా, అలస్కా రాష్ట్రాల్లో ట్రంప్ లీడ్‌లో ఉన్నారు. ఈ నాలుగు రాష్ట్రాల్లో గెలిస్తే ట్రంప్‌కు 54 ఓట్లు వస్తాయి. అంటే.. 267కి చేరుకుంటారు. ప్రస్తుతం ఉన్న ట్రెండ్స్ ప్రకారం ఆయా రాష్ట్రాలు అటూ ఇటూ స్వింగ్ కాకుండా ఉంటే.. బిడెన్ అధ్యక్షుడవుతారు. కానీ.. చాలా స్వల్ప ఆధిక్యతలో బిడెన్ ఉన్న విన్ కాన్సిన్, మిచిగాన్, నెవడా రాష్ట్రాల్లో ఏ ఒక్కటి స్వింగ్ అయినా ట్రంప్ మళ్లీ అధ్యక్షుడవుతారు. 

ప్రస్తుతం ఎవరి వైపు మొగ్గు లేదు.  ఎవరికీ అడ్వాంటేజ్ లేదు. చివరి ఓటు లెక్కించే వరకూ అమెరికా అధ్యక్ష ఎన్నికల ఫలితంపై అంచనా కు రావడం కష్టం. ఓవరాల్‌గా ఓట్లలో మాత్రం… బిడెన్ స్పష్టమైన ఆధిక్యత చూపిస్తున్నారు. పోలైన ఓట్లలో యాభై శాతానికిపైగా ఆయనకు దక్కాయి. ట్రంప్‌కు 48.3 శాతమే వచ్చాయి.

ఫలితాలొచ్చిన తర్వాత కూడా.. న్యాయపోరాటం చేస్తామని ఇరువురు అభ్యర్థులు ప్రకటించారు. ఒక వేళ అలాగే కోర్టుకెళితే …  అధ్యక్ష ఎన్నిక ఫలితం ప్రకటన ఆలస్యమయ్యే అవకాశం ఉంటుంది.