తెలుగు న్యూస్ చానళ్లలో టీవీ9 తన అగ్రస్థానాన్ని కోల్పోయింది. ఎన్టీవ మొదటి స్థానానికి వచ్చింది. చాలా కాలం విరామం తర్వాత బార్క్ టీవీ చానళ్ల రేటింగ్స్‌ను ప్రకటించింది. వీటిని చూసిన టీవీ9 యాజమాన్యానికి మైండ్ బ్లాంక్ అయిపోయి ఉంటుంది. ఈ ఏడాది పదో వారం రేటింగ్స్ ను చూస్తే ఓవరాల్‌గా 77 పాయింట్లతో ఎన్టీవీ అగ్రస్థానంలో ఉంది. టీవీ స్థానం రెండో స్థానానికి పడిపోయింది. అది కూడా దరి దాపుల్లో లేదు. కేవలం యాభై ఐదు పాయింట్లు మాత్రమే టీవీ9 సాధించింది. అంటే మొదటి స్థానానికి మధ్య ఇరవై రెండు పాయింట్ల తేడా ఉంది. మూడో స్థానంలో తెలంగాణ చానల్ వీ6 నిలిచింది. టీవీ 5, ఏబీఎన్ , సాక్షి, ఇతర టీవీ చానళ్లు 15 నుంచి ౩0 మధ్య రేటింగ్‌లు సాధిస్తూ ఉనికి నిలుపుకున్నాయి. అర్బన్ , రూరల్ ప్రాంతాల్లోనూ ఎన్టీవీదే ఆధిపత్యం కనిపిస్తోంది.

టీవీ9 యాజమాన్యం రవిప్రకాష్ చేతుల నుంచి ఇతరులకు అప్పగించిన తర్వాత ఆ చానల్ ఇమేజ్ దారుణంగా పడిపోతూ వస్తోంది. బయాస్ న్యూస్‌కు ప్రతిరూపం అనే విమర్శలు ఎదుర్కోంటోంది. అదేసమయంలో అధికార రాజకీయ పార్టీలకు అనుకూలంగా ఇతరులపై తప్పుడు ప్రచారానికి కూడా వెనుకాడని వైనం టీవీ 9 ఇమేజ్‌ను మరింత దిగజార్చిందని అనుకోవచ్చు. ఈ పరిస్థితుల్లో ఇటుక ఇటుక పేర్చుకుటూ వచ్చిన ఇమేజ్…రియల్ ఎస్టేట్ యాజమానులైన… కొత్త యాజమాన్యం స్వార్థానికి కరిగిపోవడం ప్రారంభించింది.

నిజానికి ఎన్టీవీ కూడా ఆ తాను ముక్కే. అందులోనూ టీవీ9 పెట్టుబడిదారుల డబ్బులున్నాయి.అయితే ఆ చానల్ యజమాన్యం కాస్తయినా జర్నలిజం ప్రమాణాలను పాటించే ప్రయత్నం చేస్తోంది. టీవీ9లా పూర్తి స్థాయిలో దిగజారిపోలేదు. అందుకే టీవీ9 కన్నా ఎన్టీవీ బెటర్ అన్నట్లుగా పరిస్తితి మారింది. న్యూస్ చానళ్ల రేటింగ్‌లు చాలా కాలంగాఇవ్వడం లేదు. తప్పుడు రేటింగ్‌ల కోసం చానళ్లు అక్రమాలకు పాల్పడినట్లుగా కేసులు నమోదయ్యాయి. ఈ కేసులో టీవీ9 కూడా ఉంది. ఈ క్రమంలో రేటింగ్‌లు దారుణంగా పడిపోవడం.. ఆ చానల్ ఇమేజ్‌కు మరింత దెబ్బే.