టీవీ9 మాజీ సీఈఓ రవిప్రకాష్ అజ్ఞాతంలోకి వెళ్ళినట్లుగా సైబరాబాద్ పోలీసులు నిర్ధారణకు వచ్చారు. వివాదం మొదలైన మొదటి రోజున అజ్ఞాతం లోకి వెళ్ళాడు అని కొన్ని చానల్స్ లో వార్తలు రాగానే టీవీ 9 తెర మీదకు వచ్చి రవి ప్రకాష్ ఖండించడంతో చాలా చానల్స్ మరియు మీడియా సంస్థలు రవిప్రకాశ్ అజ్ఞాత వార్తలను అంత తేలికగా నమ్మడం లేదు. అయితే ఈ దఫా “ఈనాడు” వంటి పత్రికలలో సైతం రవి ప్రకాష్ అజ్ఞాతంలోకి వెళ్లిపోయాడు అంటూ వార్త రావడంతో, ప్రస్తుతానికి రవిప్రకాష్ ఆచూకీ పోలీసులకు లభ్యం కాకపోవడంతో, రవి ప్రకాష్ అజ్ఞాతవాసం ప్రస్తుతానికి తెలుగు రాష్ట్రాలలో హాట్ టాపిక్ అయింది.
అయితే ఇప్పుడు సోషల్ మీడియాలో రవి ప్రకాష్ మీద సెటైర్లు బాగానే పడుతున్నాయి. చానల్స్ తన చేతిలో ఉన్నప్పుడు, తనకు నచ్చినట్లుగా నియంతృత్వ ధోరణిలో మీడియా సంస్థ ని నడిపి, తనకు నచ్చిన వారిని హైలెట్ చేయడం, నచ్చని వారిపై వ్యక్తిత్వాన్ని హననం చేసేలా తీవ్ర వ్యతిరేక కథనాలు పదే పదే ప్రసారం చేయడం లాంటివి చేయడంతో రవిప్రకాష్ మీద ప్రజలలో ఎంతమాత్రం సానుభూతి కనిపించడం లేదు. అయితే గత ఏడాది పవన్ కళ్యాణ్ మీడియా మీద తిరగబడ్డ సమయంలో రవి ప్రకాష్ ని ఉద్దేశించి ” రియల్ అజ్ఞాతవాసి ఎవరో మీకు తెలుసా రవి ప్రకాష్” అంటూ వేసిన ట్వీట్ ఇప్పుడు సోషల్ మీడియాలో మళ్ళీ వైరల్ గా మారింది. ఆ నిజమైన అజ్ఞాతవాసి రవిప్రకాషే అయ్యాడు అంటూ సోషల్ మీడియాలో నెటిజన్ల సెటైర్లు వేస్తున్నారు.
ఇక టీవీ9 సి ఎఫ్ ఓ మూర్తిని రెండో రోజు కూడా విచారించిన పోలీసులు, త్వరలోనే నటుడు శివాజీ ని కూడా విచారించే అవకాశం ఉన్నట్లు తెలుస్తోంది. రవి ప్రకాష్ కోసం గాలింపు చర్యలు ముమ్మరంగా జరుపుతున్నామని పోలీసులు తెలిపారు.
