నాని – సుధీర్ బాబు ల సినిమా `వి` విడుద‌ల‌కు సిద్ధ‌మైంది. ఈరోజు రాత్రి స‌రిగ్గా 12 గంట‌లకు అమేజాన్ ప్రైమ్‌లో బొమ్మ ప‌డ‌బోతోంది. ఓటీటీ లో విడుద‌ల అవుతున్న తొలి పెద్ద సినిమా కావ‌డంతో – `వి`పై అంద‌రి దృష్టీ ప‌డింది. ఈ సినిమా రిజ‌ల్ట్ బాగుంటే – మ‌రిన్ని సినిమాలు ఓటీటీలోకి వ‌చ్చేస్తాయి.

అయితే ఈ సినిమా టైటిల్ పై ముందు నుంచీ ఆస‌క్తిక‌ర‌మైన చ‌ర్చ న‌డుస్తోంది. `వి` అంటే ఏమిటి? అనే ప్ర‌శ్న ముందు నుంచీ ఎదుర‌వుతూనే ఉంది. `విక్ట‌రీ`, `వెరైటీ`… ఇలా ఎవ‌రికి తోచిన నిర్వ‌చ‌నాలు వాళ్లు ఇస్తున్నారు. ఈ ప్ర‌శ్న అటు నానిని గానీ, ఇటు ఇంద్ర‌గంటిని గాని అడిగితే… `సినిమా చూసి తెలుసుకోండి` అని త‌ప్పించుకుంటున్నారు. ఇప్పుడు వి అంటే అర్థం తెలిసిపోయింది. `వి` అంటే విష్ణు. ఈ సినిమాలో నాని పేరు.. విష్ణు. `వి` అనే లోగో. ఈ సినిమాలో కొన్ని చోట్ల క‌నిపిస్తుంద‌ట‌. అందుకే ఈ టైటిల్ ఫిక్స్ చేశారు. అదీ.. మేట‌రు.