క‌రోనా ఎఫెక్ట్, లాక్ డౌన్‌ల వ‌ల్ల షూటింగులు ఆగిపోయాయి. పోస్ట్ ప్రొడ‌క్ష‌న్ ప‌నుల‌కూ ఆటంకం ఏర్ప‌డింది. అయితే కొన్ని సినిమాలు మాత్రం ధైర్యం చేస్తున్నాయి. వీలైనంత వ‌ర‌కూ సినిమాని సిద్ధం చేసే ప్ర‌య‌త్నాల్లో ఉన్నాయి. అందులో భాగంగా `వ‌కీల్ సాబ్‌`కి సంబంధించిన వ‌ర్క్ కూడా మొద‌లైపోయింద‌ని తెలుస్తోంది. లాక్ డౌన్ వ‌ల్ల‌.. వ‌కీల్ సాబ్ షూటింగ్ వాయిదా ప‌డింది. కాక‌పోతే… దాదాపు మూడొంతుల షూటింగ్ పూర్తయ్యింది. ఇందుకు సంబంధించి ఎడిటింగ్‌, రీ రికార్డింగ్ ప‌నులు మళ్లీ మొద‌ల‌య్యాయి. త‌మ‌న్ ప్ర‌స్తుతం ఆర్‌.ఆర్ ప‌నులు మొద‌లెట్టినట్టు టాక్‌. ఇప్ప‌టికే ఈ సినిమా నుంచి `మ‌గువా.. మ‌గువా` పాట‌ని విడుద‌ల చేశారు. మ‌రో పాట కంపోజింగ్ కూడా పూర్త‌య్యింది. మంచి ముహూర్తం చూసుకుని ఆ పాట‌నీ విడుద‌ల చేయ‌బోతున్న‌ట్టు తెలుస్తోంది. సెప్టెంబ‌రు 2 ప‌వ‌న్ పుట్టిన రోజు. ఈ సంద‌ర్భంగా వ‌కీల్ సాబ్ టీజ‌ర్ విడుద‌ల చేయ‌నున్నారు. టీజ‌ర్ క‌టింగ్ కి సంబంధించిన ప‌నులు కూడా జ‌రుగుతున్నాయని, ఈసారి ప‌వ‌న్ బ‌ర్త్ డే ట్రీట్ … అభిమానుల్ని అల‌రించేలా ఉంటుంద‌ని స‌మాచారం.