సురేంద‌ర్ రెడ్డి ద‌ర్శ‌కత్వంలో ప‌వ‌న్ క‌ల్యాణ్ ఓ సినిమా చేస్తాడ‌ని ఇటీవ‌ల ఓ వార్త టాలీవుడ్ లో చ‌క్క‌ర్లు కొడుతోంది. ఈ కాంబో.. దాదాపు ఖాయ‌మైన‌ట్టే. ప‌వ‌న్ కోసం వ‌క్కంతం వంశీ ఓ మంచి క‌మ‌ర్షియ‌ల్ క‌థ‌ని సిద్ధం చేసిన‌ట్టు విశ్వ‌స‌నీయ వ‌ర్గాల స‌మాచారం. సురేంద‌ర్ రెడ్డి, వ‌క్కంతంల‌ది మంచి కాంబో. వీరిద్ద‌రూ ఎప్పుడు క‌లిసినా మంచి సినిమానే ఇచ్చారు. కిక్‌, రేసుగుర్రం లాంటి సూప‌ర్ హిట్ చిత్రాల‌కు వ‌క్కంతంనే క‌థ అందించాడు. ఇప్పుడు మ‌రోసారి ప‌వ‌న్ కోసం అలాంటి క‌మ‌ర్షియ‌ల్ క‌థ‌ని సిద్ధం చేశాడ‌ని తెలుస్తోంది. రామ్ తాళ్లూరి ఈ చిత్రానికి నిర్మాత‌. ప్ర‌స్తుతం అఖిల్ కోసం ఓ క‌థ త‌యారు చేస్తున్నాడు సురేంద‌ర్ రెడ్డి. ఈ సినిమా పూర్త‌య్యాకే.. ప‌వ‌న్ ప్రాజెక్టు ముందుకు వెళ్తుంది. ఈలోగా ప‌వ‌న్ చేయాల్సిన సినిమాలూ ఉన్నాయి. `వ‌కీల్ సాబ్‌` త‌ర‌వాత‌.. క్రిష్ సినిమా మొద‌లెడ‌తాడు ప‌వ‌న్‌. ఆ త‌ర‌వాత‌.. హ‌రీష్ శంక‌ర్ సినిమా ప‌ట్టాలెక్కుతుంది. ఇవ‌న్నీ అయ్యాకే.. సురేంద‌ర్ రెడ్డి సినిమా మొద‌ల‌వుతుంది.