జ‌మానా మారింది. సినిమా త‌ర‌వాత మ‌రో సినిమా. మ‌ధ్య‌లో ఖాళీ. ఇది వ‌ర‌కు ద‌ర్శ‌కుల ప‌రిస్థితి అది. కానీ.. ఇప్ప‌టి ద‌ర్శ‌కులు వేరు. ఖాళీ అనే ప‌దానికి వాళ్ల డిక్ష‌న‌రీలో అర్థ‌మే లేదు. కాస్తంత టాలెంట్ ఉంటే చాలు బోలెడంత ప‌ని. ప్ర‌తీ అగ్ర ద‌ర్శ‌కుడూ.. యాడ్ల రూపంలో బాగానే సంపాదించారు. ఇప్పుడు ఓటీటీ వేదిక‌లు తోడ‌య్యాయి. అటు సినిమాటు – ఇటు ఓటీటీ అంటూ రెండు ప‌డ‌వ‌ల ప్ర‌యాణం చేస్తున్నారు కొంత‌మంది ద‌ర్శ‌కులు. వాళ్ల‌లో క్రిష్ ముఖ్యుడు. క్రిష్ యాడ్ల రంగంలోనూ బిజీ. క్రిష్ బాట‌లోనే మ‌రో ద‌ర్శ‌కుడు వ‌చ్చి చేరాడు.. త‌నే వంశీ పైడిప‌ల్లి.

రాశి కంటే వాశి ముఖ్య‌మ‌ని న‌మ్మే ద‌ర్శ‌కుడు వంశీ పైడిప‌ల్లి. అందుకే త‌న నుంచి త‌క్కువ సినిమాలొచ్చాయి. కానీ.. అన్నీ గుర్తుండిపోయేవే. మ‌హేష్‌తో `మ‌హ‌ర్షి` తీశాక‌.. త‌న‌కే మ‌రో క‌థ వినిపించాడు. అన్నీ ఓకే అనుకున్న స‌మ‌యంలో అది వ‌ర్క‌వుట్ కాకుండా పోయింది. మ‌హేష్ `నీతో సినిమా చేస్తా` అని భ‌రోసా ఇచ్చినా అది కార్య‌రూపం దాల్చ‌డానికి టైమ్ ప‌ట్టేట్టు ఉంది. అందుకే ఈలోగా ఓటీటీ వైపు దృష్టి సారించాడు వంశీ. త్వ‌ర‌లోనే ఆహా కోసం ఓ వెబ్ సిరీస్ రూపొందిస్తున్నాడ‌ట వంశీ. అందుకు సంబంధించిన స‌న్నాహాలు సాగుతున్నాయి. ఓ వెబ్ సిరీస్‌లో వీలైనన్ని ఎపిసోడ్లు తాను ద‌ర్శ‌క‌త్వం వ‌హిస్తాడు. మ‌రో వెబ్ సిరీస్‌కి నిర్మాత‌గా వ్య‌వ‌హ‌రించ‌బోతున్నాడు. ప్ర‌స్తుతం ఆహా టీమ్ తో చ‌ర్చ‌లు సాగుతున్నాయి. త్వ‌ర‌లోనే అధికారిక ప్ర‌క‌ట‌న రావొచ్చు.