చిత్ర‌సీమ‌లో దాదాపుగా డైరెక్ట‌ర్లంతా బిజీ. రాబోయే రెండు మూడు సినిమాల‌కు సైతం లైన‌ప్పులు చేసుకొన్నారు. కానీ వంశీ పైడిప‌ల్లి ప‌రిస్థితి మాత్రం ఇందుకు భిన్నంగా ఉంది. 2013 సంక్రాంతికి ఆయ‌న్నుంచి ఓ సినిమా వ‌చ్చింది. అప్పటి నుంచి ఆయ‌న సినిమాకు సంబంధించిన కొత్త విష‌య‌మేదీ బ‌య‌ట‌కు రాలేదు. అలాగ‌ని ఆయ‌న ఖాళీగా లేరు. క‌థ‌లు సిద్ధం చేసుకొని, హీరోల వేట‌లో ఉన్నారు. దిల్ రాజు బ్యాన‌ర్‌లో వంశీ ఓ సినిమా చేయాలి. అయితే హీరో దొర‌క‌డం లేదు. టాలీవుడ్ లో హీరోలంతా బిజీ. త‌మిళ హీరోలూ అందుబాటులో లేరు. అందుకే ఇప్పుడు ఆయ‌న బాలీవుడ్ వెళ్లారు. అక్క‌డో పెద్ద స్టార్‌తో సినిమా చేసే ప్ర‌య‌త్నాల్లో త‌ల‌మున‌క‌లైపోయారు. ఇద్ద‌రు ముగ్గురు హీరోల‌కు క‌థ‌లు చెప్పారు. ఆ చ‌ర్చ‌లు ఇప్పుడు ముమ్మ‌రంగా జ‌రుగుతున్నాయి. అతి త్వ‌ర‌లోనే ఓ హీరో ఫైన‌ల్ అయ్యే అవ‌కాశాలు ఉన్నాయి.

బాలీవుడ్ హీరోల‌కు సౌత్ ద‌ర్శ‌కుల‌పై గురి కుదిరింది. ద‌క్షిణాదికి చెందిన ద‌ర్శ‌కుడు క‌థ చెబుతున్నాడంటే, విన‌డానికీ, క‌థ న‌చ్చితే చేసేయ్య‌డానికి రెడీగా ఉన్నారు. అందుకే వంశీ పైడిప‌ల్లి లైన్ క్లియ‌ర్ అయిన‌ట్టు తెలుస్తోంది. బాలీవుడ్ లోనూ క్రేజీ కాంబినేషన్ల‌తో సినిమాలు చేయాల‌ని దిల్ రాజు భారీ స్కెచ్చులే వేస్తున్నారు. అందులో భాగంగా ఈ ప్రాజెక్టు ఫైన‌ల్ చేసిన‌ట్టు టాక్ న‌డుస్తోంది. పూర్తి వివ‌రాలు త్వ‌ర‌లో తెలుస్తాయి.