వంశీ.. ఎన్ని గొప్ప సినిమాలొచ్చాయ్ ఈయ‌న్నుంచి?! లేడీస్ టైల‌ర్‌, అన్వేష‌ణ, చెట్టుకింద ప్లీడ‌ర్‌, సితార.. అన్నీ మ్యూజిక‌ల్ హిట్సే. ఔను వాళ్లిద్ద‌రూ ఇష్ట‌ప‌డ్డారుతో సెకండ్ ఇన్నింగ్స్ స్టార్ట్ చేశారు. ఈసారీ ఆయ‌న‌కు విజ‌యాలు ప‌ల‌క‌రించాయి. గ‌త కొంత‌కాలంగా వంశీ బాగా సైలెంట్ అయిపోయారు. ఆయ‌న 25వ చిత్రం వెన్నెల్లో హాయ్ హాయ్ ఆప‌సోపాలు ప‌డి విడుద‌లైంది.. అదెప్పుడొచ్చిందో, ఎప్పుడు వెళ్లిపోయిందో కూడా ఎవ్వ‌రికీ తెలీదు. 26వ సినిమా కూడా మొద‌లైన‌ట్టే మొద‌లై ఆగిపోయింది. ఇప్పుడు మళ్లీ రంగంలోకి దిగుతున్నారు వంశీ. నూత‌న న‌టీన‌టుల‌తో వంశీ ఓ సినిమాని ప్లాన్ చేస్తున్న‌ట్టు స‌మాచారం.
ఇది లేడీస్‌టైల‌ర్‌కి సీక్వెల్‌. ఈ సినిమాని ముందు ర‌వితేజ‌తో చేద్దామ‌నుకొన్నారు. ఆ త‌ర‌వాత రాజ్ త‌రుణ్ ద‌గ్గ‌ర‌కు వెళ్లిందీ క‌థ. ఎందుక‌నో.. రాజ్‌త‌రుణ్ కూడా హ్యాండిచ్చేశాడు. అందుకే ఇప్పుడు ఓ కొత్త హీరోని వెదికిప‌ట్టుకొనే ప‌నిలో నిమ‌గ్న‌మ‌య్యాడు వంశీ. అన్న‌ట్టు ఈ చిత్రానికీ ఇళ‌య‌రాజానే సంగీతం అందిస్తార‌ని తెలుస్తోంది. అంటే.. మళ్లీ ఆ సూప‌ర్ డూప‌ర్ మ్యూజిక‌ల్ హిట్ పాట‌ల్ని వినేయ‌డానికి సిద్ధ‌ప‌డిపోవాల‌న్న‌మాట.
