వెంక‌టేష్ సినిమా అంటే ఈమ‌ధ్య మ‌ల్టీస్టార‌రే అనే ఫీలింగ్ వ‌చ్చేస్తోంది. ఆయ‌న మ‌రో హీరోతో క‌లిసి తెర పంచుకోవ‌డానికి ఉత్సాహం చూపిస్తున్నారు. ఆ త‌ర‌హా క‌థ‌లు వ‌ర్క‌వుట్ అవుతున్నాయి కూడా. ఎఫ్ 2, ఎఫ్ 3 చిత్రాలే అందుకు ఉదాహ‌ర‌ణ. అనిల్ రావిపూడితో ఇప్పుడు వెంకీ మ‌రో సినిమా చేస్తున్నాడు. ‘సంక్రాంతికి వ‌స్తున్నాం’ అనే మంచి టైటిల్ ఫిక్స్ చేశారు. ఇందులోనూ వెంకీతో పాటు మ‌రో హీరో ఉంటాడన్న వార్త‌లు ఊపందుకొంటున్నాయి. ఓ కీల‌క‌మైన పాత్ర‌లో సిద్దు జొన్న‌ల‌గ‌డ్డ న‌టిస్తాడంటూ ప్ర‌చారం జ‌రుగుతోంది.
అయితే అంద‌రూ అనుకొంటున్న‌ట్టు ఇది మ‌ల్టీస్టార‌ర్ కాదు. సోలో హీరో సినిమానే. అందులో ఎలాంటి డౌటూ అక్క‌ర్లెద్దు. క‌థ ప్ర‌కారం ఇద్ద‌రు హీరోయిన్ల‌కు చోటుంది. ఓ క‌థానాయిక‌గా మీనాక్షి చౌద‌రి ఎంపిక ఖాయ‌మైంది. మ‌రో నాయిక కోసం అన్వేషిస్తున్నారు. భీమ్స్ ఈ చిత్రానికి సంగీతాన్ని స‌మ‌కూరుస్తున్నారు. 2025 సంక్రాంతికి ఈ చిత్రాన్ని విడుద‌ల చేస్తారు. సొంతూరు, స్నేహితులు… వీటి ప్రాధాన్య‌త చెప్పే క‌థ ఇది. త్వ‌ర‌లోనే షూటింగ్ మొద‌ల‌వుతుంది.
