విక్టరీ వెంకటేష్ ఈ మధ్య కాస్త స్లో అయినట్టు కనబడ్డా బాబు బంగారంతో మళ్లీ రేసులో నిలబడ్డాడు.. మారుతి దర్శకత్వంలో వస్తున్న ఈ సినిమా దాదాపు పూర్తి కావొచ్చింది. జూన్ మొదటి వారంలో రిలీజ్ చేసేందుకు సన్నాహాలు చేస్తున్నారు. అయితే ఈ సినిమా తర్వాత వెంకటేష్ మరో రెండు రీమేక్ సినిమాలు చేస్తున్నాడని వార్తలు ఊపందుకున్నాయి. తమిళంలో సూపర్ సక్సెస్ అయిన ‘సేతుపతి’, మలయాళంలో సూపర్ హిట్ కొట్టిన ‘టూ స్టేట్స్’ సినిమాను తెలుగులో వెంకీ హీరోగా తెరకెక్కిస్తున్నారని ఒకటే హడావిడి చేస్తుంది మీడియా.
ఆ సినిమాలను కూడా వెంకటేష్ తన ఓన్ బ్యానర్ అయిన సురేష్ ప్రొడక్షన్ లోనే నిర్మిస్తున్నారని టాక్. అయితే ఈ వార్తలన్నిటికి సురేష్ ప్రొడక్షన్ నిర్మాణ సంస్థ కొట్టిపారేసింది. ప్రస్తుతం వెంకటేష్ బాబు బంగారం మాత్రమే చేస్తున్నాడని.. తర్వాత సినిమా మీద ఇంకా ఎలాంటి నిర్ణయాలను తీసుకోలేదని వారు తేల్చి చెప్పారు. టూ స్టేట్స్ సినిమాను రైట్స్ బండ్ల గణేష్ దక్కించుకోగా.. సేతుపతి సినిమా కోసం తెలుగు నిర్మాతలు పోటీ పడుతున్నారు. బాబు బంగారం తర్వాత చేసే సినిమా కోసం కొన్ని కథలు వింటున్న వెంకటేష్ త్వరలో ఓ అధికారిక ప్రకటన తెలియచేసే అవకాశం ఉంది అని తెలుస్తుంది.
