టాలీవుడ్ లో రీమేక్ లకు రారాజు ఎవరంటే అందరు ముక్తకంఠంతో చెప్పేది ఒక్కే ఒక్క పేరు అది విక్టరీ వెంకటేష్. గోపాలా గోపాల సినిమా తర్వాత చాలా గ్యాప్ ఇచ్చిన వెంకీ ప్రస్తుతం మారుతి దర్శకత్వంలో ‘బాబు బంగారం’ చిత్రీకరణలో బిజీగా ఉన్నాడు. ఇక ఈ సినిమా తర్వాత మలయాళ దర్శకుడితో ఓ సినిమా అంటూ ప్రచారం జరుగుతుంది. అయితే ప్రస్తుతం ట్రెండ్ క్రియేట్ చేస్తున్న ఓ సినిమా మీద వెంకీ కన్ను పడ్డదట.
మాధవన్, రితికా సింగ్ ప్రధాన పాత్రల్లో వస్తున్న ‘సాలా కడూస్’ రాజ్ కుమార్ హిరాణి నిర్మిస్తుండగా సుధ కొంగర ప్రసాద్ దర్శకత్వం వహిస్తున్నారు. సినిమా ఫస్ట్ లుక్ టీజర్ నుండి ట్రెండ్ క్రియేట్ చేస్తున్న ఈ సినిమా రేపు విడుదలవుతుంది. తమిళ, హిందీ భాషల్లో తెరకెక్కించిన ఈ సినిమా స్పోర్ట్స్ బ్యాక్ గ్రౌండ్ లో నడుస్తుంది. ఓ రిటైర్డ్ బాక్సర్ లేడీ బాక్సర్ ను ఎలా చాంపియన్ ను చేశాడు అనేది ఈ సినిమా కథ.
అయితే ఇప్పటికే సినిమా చూసిన వెంకటేష్ తెలుగులో రీమేక్ చేసే ఆలోచనలో ఉన్నట్టు తెలుస్తుంది. ఇక సినిమా విడుదలయ్యి సక్సెస్ అయితే బాబు బంగారం తర్వాత వెంకీ తీసే సినిమా ఇదే అయినా ఆశ్చర్యపోవాల్సిన పనిలేదు.
