మరో మూడు నాలుగు రోజుల్లో వెంకటేష్ హీరోగా తేజ దర్శకత్వంలో సురేష్ ప్రొడక్షన్స్, ఏకే ఎంటర్టైన్మెంట్స్ సంస్థలు సంయుక్తంగా నిర్మించే సినిమా షూటింగ్ మొదలు కానుంది. ఈలోపు సినిమాకు పైరసీ దెబ్బ తగిలింది. సినిమాలో వెంకీ లుక్ ఇదేనంటూ ఒక లుక్ బయటకు వచ్చింది. ప్రతి సినిమాలోనూ హీరో లుక్ విషయమై టీమ్ మధ్య డిస్కషన్ జరుగుతుంటుంది. వీలయితే రెండు మూడు లుక్స్ టెస్ట్ చేసుకుంటారు. అలా లుక్ టెస్ట్ కోసం దిగిన ఫోటోలను ఎవరో ఫేస్‌బుక్‌లో పోస్ట్ చేశారు. అది కాస్త వైరల్ అవుతోంది. ఈ సినిమాలో వెంకటేష్ కాలేజ్ ప్రొఫెసర్ పాత్రలో నటిస్తున్నట్టు సమాచారం. చేతిలో టెక్స్ట్ బుక్స్, భుజానికి బ్యాగ్, కళ్ళజోడు, సూటు… అందుకు తగ్గట్టు లుక్ ఉంది కదూ. హెయిర్ స్టైల్ కూడా మార్చారు. సినిమాలో కూడా ఇదే లుక్ తో కనిపిస్తారని సమాచారమ్. ఇందులో శ్రియ హీరోయిన్. ఈ సినిమాకి ‘ఆట నాదే వేట నాదే’ టైటిల్ పరిశీలనలో ఉంది. లుక్ లీక్ విషయమై ఇంకా సినిమా యూనిట్ స్పందించలేదు.