లేడీ సూపర్ స్టార్ విజయశాంతి దశాబ్ద కాలం తర్వాత ఇటీవల సరి లేరు నీకెవరు సినిమా తో రీ ఎంట్రీ ఇచ్చిన సంగతి తెలిసిందే. ఈ సినిమా భారీ విజయం సాధించడంతో విజయశాంతి కి ప్రత్యేక పాత్రల ఆఫర్లు వెల్లువలా వచ్చిపడుతున్నాయి. బహుశా ఆఫర్ల తాకిడిని తట్టుకోలేక విజయశాంతి సోషల్ మీడియా వేదికగా తన భావాలను తన ఉద్దేశాలను పంచుకుంది. తన మొదటి ప్రాధాన్యత రాజకీయాలకే అని, సినిమాలు చేసేంత సమయం సందర్భం తనకు మళ్లీ దొరుకుతుందో లేదో అని, ప్రస్తుతానికైతే సినిమాలకు సెలవు అని ప్రకటించింది.

విజయశాంతి ట్వీట్ చేస్తూ, “సరిలేరు మీకెవ్వరు ఇంత గొప్ప విజయాన్ని నాకు అందించిన, నన్ను ఎల్లప్పుడూ ఆదరిస్తూ వస్తున్న ప్రేక్షకులకు, అభిమానులకు మనస్ఫూర్తిగా ధన్యవాదములు. నా నట ప్రస్ధానానికి 1979 కళ్ళుకుల్ ఇరమ్,కిలాడి కృష్ణుడు నుండి నేటి 2020 సరిలేరునీకెవ్వరు వరకు ఆగౌరవాన్ని అందించిన ప్రతిఒక్కరికి కృతజ్ఞతలు. ప్రజా జీవన పోరాటంలో నా ప్రయాణం… మళ్లీ మరో సినిమా చేసే సమయం, సందర్భం నాకు కల్పిస్తోందో, లేదో నాకు కూడా తెలియదు.. ఇప్పటికి ఇక శెలవు. మనసు నిండిన మీ ఆదరణకు, నా ప్రాణప్రదమైన అభిమాన సైన్యానికి ఎప్పటికీ నమస్సులు ” అని రాసుకొచ్చింది.

మొత్తానికి, సినిమాలకు విజయశాంతి మళ్లీ విరామం ప్రకటించడం ఆవిడ అభిమానులకు కాస్త చేదు వార్తే.