అప‌రిచితుడు సినిమా విక్ర‌మ్‌కి ఎంత మేలు చేసిందో తెలీదు గానీ… త‌న కెరీర్‌తో బంతాట ఆడేసుకొంది మాత్రం అదే. ఒకే సినిమాలో నాలుగైదు గెట‌ప్పుల్లో క‌నిపించి అల‌రించాడు విక్ర‌మ్‌. అప్ప‌టి నుంచి అదే అల‌వాటైపోయింది. విక్ర‌మ్ సినిమా అంటే గెట‌ప్పులు మార్చాల్సిందే అన్నంత‌గా త‌యారైంది. మ‌ల్ల‌న్న నుంచి ఐ వ‌ర‌కూ విక్ర‌మ్ వేయ‌ని గెట‌ప్పు లేదు. పాత్ర ప‌రంగా చూపించ‌ని వైవిద్యం లేదు. అయితే ఆ సినిమాలేం ఆడ‌లేదు. పైగా విక్ర‌మ్‌లోని న‌టుడు గెట‌ప్పుల మాటున హ‌రించుకుపోయాడు. గెట‌ప్పుల‌పై చూపిస్తున్న మోజు క‌థ‌ల ఎంపిక‌లో చూపించ‌డం లేద‌న్న విమ‌ర్శ మూట‌గ‌ట్టుకొన్నాడు.

ఇప్పుడూ అంతే..! విక్ర‌మ్ క‌థానాయ‌కుడిగా న‌టించిన తాజా చిత్రం.. ఇంకొక్క‌డు. న‌య‌న‌తార‌, నిత్య‌మీన‌న్‌లు క‌థానాయిక‌లుగా న‌టించారు. ఆనంద్ శంక‌ర్ ద‌ర్శ‌కుడు. ఈ సినిమా టీజ‌ర్ ఆస‌క్తిక‌రంగానే ఉన్నప్ప‌టికీ… ఇందులోనూ గెట‌ప్పుల‌తో హోరెత్తించాడు విక్ర‌మ్‌. ఓ అడుగు ముందుకేసి ‘తేడా’ క్యారెక్ట‌ర్‌లోనూ ప‌ర‌కాయ ప్ర‌వేశం చేశాడు. ఆ మాడ్యులేష‌న్‌, లుక్ డిఫ‌రెంట్‌గా ఉన్న‌ప్ప‌టికీ ఈ సినిమాపైనా అనుమానాలు రేకెత్తుతున్నాయి. గెట‌ప్పులు త‌ప్ప‌.. క‌థేం ఉండ‌దేమో అన్నంత భ‌యం మొద‌లైంది. విక్ర‌మ్ కెరీర్ మున్ముందు సాఫీగా న‌డ‌వాలంటే ఈ సినిమాతో హిట్టు కొట్ట‌డం కంప‌ల్స‌రీ. అలాంట‌ప్పుడు మ‌ళ్లీ ప్ర‌యోగాల బాటే అందుకొని రిస్క్ చేస్తున్నాడేమో అనిపిస్తుంది. సినిమా హిట్ట‌యితే ఫ‌ర్వాలేదు. బాగా క‌ష్ట‌ప‌డ్డాడు అని గెట‌ప్పుల గురించీ మాట్లాడుకొంటారు. ఫ్లాప‌యితే మాత్రం మ‌ళ్లీ విమ‌ర్శ‌లు త‌ప్ప‌వు.

https://www.youtube.com/watch?v=L_0jexAQsB0