‘జాతిర‌త్నాలు’తో త‌న మార్క్ చూపించాడు అనుదీప్‌. ఆ త‌ర‌వాత తాను చేసిన ‘ప్రిన్స్’ కూడా ఓకే అనిపించుకొంది. ర‌వితేజ‌తో అనుదీప్ ఓ సినిమా చేయాల్సివుంది. సితార ఎంట‌ర్‌టైన్‌మెంట్స్ ఈ చిత్రాన్ని నిర్మించాలి. అయితే అనివార్య కార‌ణాల వ‌ల్ల ఈ సినిమా ఆగిపోయింది. దాంతో ఇప్పుడు అనుదీప్ మ‌రో హీరోని వెదుక్కొనే ప‌నిలో ప‌డ్డాడు. ఆ ప్ర‌య‌త్నాలు కూడా ఫ‌లించిన‌ట్టు స‌మాచారం. విశ్వ‌క్‌సేన్‌తో అనుదీప్ జ‌ట్టు క‌ట్ట‌బోతున్నాడ‌ని ఇన్ సైడ్ వ‌ర్గాలు చెబుతున్నాయి. ఈ చిత్రాన్ని 14 రీల్స్ సంస్థ నిర్మించ‌నుంద‌ని టాక్‌. నిజానికి సితార ద‌గ్గ‌ర అనుదీప్ అడ్వాన్స్ ఉంది. హీరో మారినా, సితార‌లోనే అనుదీప్ సినిమా చేయాలి. అయితే.. అనుదీప్ మాత్రం 14 రీల్స్ కి క‌మిట్‌మెంట్ ఇచ్చిన‌ట్టు తెలుస్తోంది. ర‌వితేజ కోసం రాసుకొన్న క‌థ నే విశ్వ‌క్ కోసం మార్చుకొన్నాడా, లేదంటే కొత్త క‌థ రాసుకొన్నాడా? అనేది తెలియాల్సివుంది. మ‌రోవైపు చిరంజీవి కోసం కూడా అనుదీప్ ఓ స్టోరీ సిద్ధం చేస్తున్న‌ట్టు స‌మాచారం. విశ్వ‌క్ సినిమా పూర్త‌యిన త‌ర‌వాతే చిరు సినిమా ప‌ట్టాలెక్కొచ్చు. విశ్వ‌క్ ‘లైలా’ అనే చిత్రానికి ఇటీవ‌లే కొబ్బ‌రికాయ కొట్టాడు. అనుదీప్ సినిమా కూడా అతి త్వ‌ర‌లోనే క్లాప్ కొట్టుకోనుంద‌ని టాక్‌.