ఓ సినిమా సెట్స్‌పైకి వెళ్లేంత వ‌ర‌కే నిర్మాత చేతిల్లో ఉంటుంది. రిలీజ్ డేట్ పరిస్థితుల‌పై ఆధార‌ప‌డి ఉంటుంది. రిలీజ్ డేట్ ప్ర‌క‌టించ‌డం, ఆ త‌ర‌వాత వాయిదా వేయ‌డం ఈమ‌ధ్య మ‌రీ కామ‌న్ అయిపోయింది. అందుకే సినిమా హిట్టు.. అని చెప్పేంత న‌మ్మ‌కంగా రిలీజ్ డేట్ డిక్లేర్ చేయ‌లేరు. ఇలాంటి ప‌రిస్థితుల్లో సినిమా మొద‌లెట్టిన రోజే, రిలీజ్ డేట్ ప్ర‌క‌టించ‌డం అరుదైన సంగ‌తే. విశ్వ‌క్ సేన్ ఇప్పుడు అదే బాట‌లో వెళ్తున్నాడు. విశ్వ‌క్ కొత్త సినిమా ‘లైలా’ ఈరోజే షూటింగ్ ప్రారంభించుకొంది. విశ్వ‌క్ తొలిసారి లేడీ గెట‌ప్పులో క‌నిపించ‌నున్న సినిమా ఇది. ఫ‌స్ట్ లుక్ లో క‌నీక‌నిపించ‌కుండా క‌వ్విస్తున్నాడు విశ్వ‌క్‌. కొబ్బ‌రికాయ కొట్టిన రోజే నిర్మాత‌ ధైర్యంగా రిలీజ్ డేట్ కూడా ప్ర‌క‌టించేశారు. ఫిబ్ర‌వ‌రి 14న ప్రేమికుల రోజు సంద‌ర్భంగా ఈ చిత్రాన్ని ప్రేక్ష‌కుల ముందుకు తీసుకొస్తారు. అంటే… 8 నెల‌ల్లో సినిమా మొత్తం రెడీ అయిపోతుంద‌న్న మాట‌.

సాహు గార‌పాటి నిర్మాత‌గా వ్య‌వ‌హరిస్తున్నారు. రామ్ నారాయ‌ణ ద‌ర్శ‌కుడు. ఆకాంక్ష శ‌ర్మ‌ని క‌థానాయిక‌గా ఎంచుకొన్నారు. ఆమెకు ఇదే తొలి సినిమా. హీరోలు లేడీ గెట‌ప్పులు వేసిన సినిమాలన్నీ బాగా ఆడాయి. హిలేరియ‌స్ ఎంట‌ర్‌టైన‌ర్లుగా నిలిచాయి. అయితే ఓ మాస్ హీరో లేడీ గెట‌ప్ వేసి చాలా కాలం అయ్యింది. ఇప్పుడు విశ్వ‌క్ ఆ లోటు తీరుస్తున్నాడు. మ‌రి ఈ లైలా విశ్వ‌క్‌కు ఎలాంటి ఫ‌లితాన్ని అందిస్తుందో చూడాలి.