ఆగ‌స్టు 22న చిరంజీవి పుట్టిన రోజు. ఈ సంద‌ర్భంగా ‘ఇంద్ర’ సినిమాని రీ రిలీజ్ చేయాల‌న్న నిర్ణ‌యం తీసుకొంది వైజ‌యంతీ మూవీస్. ఈ మేర‌కు ఓ ప్ర‌క‌ట‌న చేసింది. ఈరోజుతో ఇంద్ర విడుద‌లై స‌రిగ్గా 22 ఏళ్లు. వైజ‌యంతీ మూవీస్ నిర్మాణంలో, బి.గోపాల్ ద‌ర్శ‌క‌త్వంలో రూపొందిన ‘ఇంద్ర‌’ అప్ప‌ట్లో ఇండ్రస్ట్రీ రికార్డుల‌న్నీ తిర‌గ‌రాసింది. వైజ‌యంతీ మూవీస్‌కు పూర్వ వైభ‌వాన్ని తీసుకొచ్చింది. వ‌రుస విజ‌యాల‌తో దూసుకుపోతున్న వైజ‌యంతీ మూవీస్ రీ రిలీజ్‌ల పై పెద్ద‌గా దృష్టి పెట్ట‌లేదు. ఈ ట్రెండ్ లో తొలిసారి త‌మ సినిమాని మ‌ళ్లీ విడుద‌ల చేయాల‌ని సంకల్పించింది. పైగా వైజయంతీ మూవీస్ కు గోల్డెన్ జూబ్లీ. ఈ సంద‌ర్భాన్ని పుర‌స్క‌రించుకొని ‘ఇంద్ర‌’ని రీ రిలీజ్ చేయాల‌న్న నిర్ణ‌యానికి వ‌చ్చింది.

Also Read : కీర‌వాణి ఫామ్ హౌస్ లో చిరంజీవి

సోనాలీ బింద్రే, ఆర్తి అగ‌ర్వాల్ క‌థానాయిక‌లుగా న‌టించిన సినిమా ఇది. మ‌ణిశ‌ర్మ అందించిన ట్యూన్లు ఎవ‌ర్ గ్రీన్‌. ముఖ్యంగా దాయి దాయి దామ్మ పాట‌కు చిరంజీవి వేసి వీణ స్టెప్పుల‌కు ఆ రోజుల్లో థియేట‌ర్లు బ‌ద్ద‌లైపోయాయి. ఆ త‌ర‌వాత చాలామంది వీణ స్టెప్పుని ఇమిటేట్ చేయ‌డానికి ప్ర‌య‌త్నించారు. పాట‌ల్లో సిగ్నేచ‌ర్ స్టెప్పుల హ‌వా ‘వీణ‌’ స్టెప్పుతోనే మొద‌లైంది. చిరు ఫ్యాక్ష‌న్ నేప‌థ్యంలో ఉన్న క‌థ చేయ‌డం అదే ప్ర‌ధ‌మం. అదే చివ‌రిసారి కూడా. రీ రిలీజ్ కి వ‌స్తే చూద్దామ‌ని ఆశ ప‌డుతున్న చిత్రాల జాబితాలో ‘ఇంద్ర’ మొదటి వ‌రుస‌లో ఉంటుంది. ఇప్పుడు వైజ‌యంతీ మూవీస్ ఆ కోరిక తీరుస్తోంది.