ప్ర‌భాస్ తో మారుతి సినిమా అన‌గానే.. అంద‌రిలోనూ చాలా అనుమానాలు.. ఇంకెన్నో ఆశ్చ‌ర్యాలు. ఈ కాంబినేష‌న్ ఎలా కుదిరింది? నిజంగానే ప‌ట్టాలెక్కుతుందా? లేదంటే.. ఇదంతా ఆరంభ శూర‌త్వమా? అంటూ ర‌క‌ర‌కాల ప్ర‌శ్న‌లు. కాంబో ప్ర‌క‌టించ‌డానికీ.. సినిమా ప‌ట్టాలెక్క‌డానికీ చాలా స‌మ‌య‌మే ప‌ట్టింది. ఎట్ట‌కేల‌కు ఈ సినిమా మొద‌లైంది. నెల‌కు 4, 5 రోజుల షూటింగ్ తో న‌త్త‌న‌డ‌క‌గా సాగుతోంది. ఇప్పుడు లేటెస్ట్ గాసిప్ ఏమిటంటే.. ఈ సినిమా ఆగిపోయింద‌ని. ఇంకెప్ప‌టికీ…. సెట్స్‌పైకి వెళ్ల‌ద‌ని. కేవ‌లం గాసిప్పుల‌పై ఆధార‌ప‌డే కొన్ని వెబ్ సైట్లు… మారుతి సినిమా ఆగిపోయిందంటూ ఊక‌దంపుడు ప్ర‌చారం మొద‌లెట్టాయి. మారుతి అంటే గిట్ట‌కో, లేదంటే వేరే కార‌ణాల వ‌ల్లో.. ఈ సినిమా విషయం పై ప్రచారం చేస్తున్నాయి. సినిమా ఆగిపోయిందంటూ నెగిటీవ్ ప్ర‌చారాన్ని ముమ్మ‌రంగా చేస్తున్నాయి.

అస‌లు విష‌యం ఏమిటంటే.. ఈ సినిమా ఆగిపోలేదు. ఆగ‌దు కూడా. ఫిబ్ర‌వ‌రిలో స‌రికొత్త షెడ్యూల్ మొద‌ల‌వుతోంది. ఈసారి ప్ర‌భాస్ మారుతి సినిమాకి గంప‌గుత్త‌గా కాల్షీట్లు కేటాయించాడు. ఈనెలాఖ‌రులోగా.. `స‌లార్‌` సినిమా పూర్త‌వ‌బోతోంది. అందుకే… ప్ర‌భాస్ మారుతి సినిమాపై పూర్తి స్థాయిలో దృష్టి పెట్టాడు. ఫిబ్ర‌వ‌రి నుంచి నెల‌కు 15 రోజుల పాటు కేవ‌లం మారుతి సినిమకే కేటాయించాల‌న్న నిర్ణ‌యం తీసుకొన్నాడు. సో.. ఫిబ్ర‌వ‌రి నుంచి ప్ర‌భాస్ – మారుతి సినిమా నాన్ స్టాప్ గా షూటింగ్ జ‌రుపుకోనుంది. ఇప్ప‌టి వ‌ర‌కూ తీసిన ర‌షెష్ ప‌ట్ల‌ ప్రభాస్ పూర్తి సంతృప్తిలో ఉన్నాడ‌ని టాక్. మారుతి స్పీడు, సెట్లో క్లారిటీ ప్రభాస్ కి బాగా న‌చ్చింద‌ని, దాంతో మిగిలిన సినిమాల్ని సైతం ప‌క్క‌న పెట్టి మారుతి సినిమాని త్వ‌రిత‌గ‌తిన పూర్తి చేయాల‌న్న నిర్ణ‌యానికి వ‌చ్చిన‌ట్టు తెలుస్తోంది. సో.. ఈ సినిమాపై వ‌స్తున్న వార్త‌లన్నీ పూర్తిగా అవాస్త‌వ‌మే. త్వ‌ర‌లోనే ప్రభాస్ సినిమాకి సంబంధించిన లేటెస్ట్ అప్ డేట్ ఇవ్వలని చిత్ర బృందం భావిస్తోంది.