వాల్తేరు వీర‌య్య సినిమాతో మంచి హిట్ అందించాడు బాబీ. ఆ త‌ర‌వాత బాల‌య్య‌తో `డాకూ మ‌హారాజ్` తీశాడు. విడుద‌ల‌కు ముందు మంచి బ‌జ్ తెచ్చుకొన్న సినిమా ఇది. మేకింగ్, టేకింగ్ లో బాబీలో మార్పు స్ప‌ష్టంగా క‌నిపించింది. ద‌ర్శ‌కుడిగా త‌న‌కు మంచి పేరు తీసుకొచ్చింది. అయితే `డాకూ మ‌హారాజ్` త‌ర‌వాత బాబీ సినిమా ఎవ‌రితో అనేది ఇంకా తేల‌లేదు. చిరంజీవితో మ‌రో సినిమా చేయ‌బోతున్నాడ‌ని ప్ర‌చారం జ‌రిగింది. అయితే చిరు అనిల్ రావిపూడి క‌థ‌కు ఓకే చెప్పారు. ఆ త‌ర‌వాత శ్రీ‌కాంత్ ఓదెల సినిమా వుంది. ఈలోగా బాబీ మ‌రో సినిమా చేసుకోవొచ్చు.

ఈసారి బాబీ బాలీవుడ్ లో సినిమా చేస్తాడ‌ని ఇన్ సైడ్ వ‌ర్గాలు చెబుతున్నాయి. మైత్రీ మూవీస్ ఈ సినిమాని నిర్మించే ఛాన్స్ వుంది. `వీర సింహా రెడ్డి` త‌ర‌వాత గోపీచంద్ మ‌లినేని బాలీవుడ్‌కు వెళ్లిపోయారు. అక్క‌డ ఓ సినిమా చేస్తున్నారు. దాన్ని కూడా మైత్రీ మూవీస్ సంస్థ‌నే తెర‌కెక్కిస్తోంది. ఇప్పుడు బాబీతో కూడా అలాంటి ప్ర‌య‌త్న‌మే చేయ‌బోతున్నార‌ని తెలుస్తోంది. బాబీ ప్ర‌స్తుతం క‌థ రెడీ చేసే ప‌నిలో ఉన్నారు. త్వ‌ర‌లోనే ఆయ‌న ముంబై వెళ్లి ఓ పెద్ద హీరోని క‌లుస్తార‌ని ప్ర‌చారం మొద‌లైంది. మార్చి, ఏప్రిల్ లోగా బాబీ సినిమాపై ఓ స్ప‌ష్ట‌త వ‌చ్చే అవ‌కాశాలు ఉన్నాయి.