బాహుబలి వస్తాడని కొంతకాలం కిందట టి కాంగ్రెస్‌ లెజిస్లేచర్‌ పార్టీ నాయకుడు జానారెడ్డి చేసిన చర్చ చాలా ఆసక్తి కలిగించింది. టిటిడిపి నేత రేవంత్‌ రెడ్డి వంటివారైతే ఆ బాహుబలి హరీష్‌రావే అన్నంత వరకూ వ్యాఖ్యానించారు. తమాషాగా ఇప్పుడు ఎపి బిజెపికి సంబంధించి అలాటి వ్యాఖ్య వినిపిస్తున్నది. కొంతకాలం బిజెపిలోవుండి ప్రత్యేక హౌదాపై పోరాడుతున్న హీరో శివాజీ ఆ పార్టీలోకి ఎవరో ప్రముఖ వ్యక్తి వస్తారనీ, అప్పుడు ప్రత్యేక హౌదా ఇస్తారని అంటున్నారు. ఒక వెబ్‌ ఛానల్‌ కోసం నేను చేసిన ఇంటర్వ్యూలో శివాజీ ఒకటికి రెండు సార్లు ఈ మాటన్నారు. ఆ వచ్చేది ఎవరంటే మాత్రం పేరు చెప్పడానికి సిద్ధపడలేదు. తనకు తెలియదంటున్నారు. . ఎవరో రావడం మాత్రం వస్తారు, బిజెపి వ్యూహం మారుతుంది అన్నది శివాజీ మాట. ఆ వ్యక్తి పవన్‌కళ్యాణ్‌ వల్లనే ప్రత్యేక హౌదా వస్తుందని మరో మాట అన్నారు. కాని ఆయన పాత్ర గురించి తనకు కొంత గందరగోళం వుందని కూడా స్పష్టం చేశారు. ఇది తన గందరగోళమే గాని ఆయనది కాకపోవచ్చని కూడా వివరించారు. ఏది ఏమైనా బిజెపి ప్రత్యేక హౌదాకు సంబంధించి అలాటి ఒక కసరత్తు ఒక ప్రముఖ వ్యక్తితో కలసి చేస్తున్నదని తనకు తెలిసిందని మాత్రం చెబుతున్నారు. మొత్తంపైన బిజెపి టిడిపి జనసేనల మధ్య త్రికోణ రాజకీయాన్ని శివాజీ వ్యాఖ్యలు మరింత రక్తికట్టిస్తున్నాయి.