వరుణ్ తేజ్ మట్కా సినిమా ఈనెల 14న వస్తోంది. లేటెస్ట్ గా రిలీజైన ట్రైలర్ కి మంచి రెస్పాన్స్ వచ్చింది. 1960 వైజాగ్ బ్యాక్ డ్రాప్ లో జరిగే కథ ఇది. రతన్ ఖత్రీ జీవితం స్ఫూర్తితో ఈ కథ రాసుకున్నానని చెప్పారు డైరెక్టర్ కరుణ కుమార్. ఇంతకీ ఎవరికీ రతన్ ఖత్రీ ? అనే ప్రశ్న సహజంగానే ఉత్పన్నమౌతుంది.

రతన్ ఖత్రీ అనడం కంటే మట్కా కింగ్ రతన్ ఖత్రీగా చాలా సుపరిచితం. గ్యాoబ్లింగ్ వరల్డ్ లో రతన్ ఖత్రీ కి ఒక సెపరేట్ ఫ్యాన్ బేస్ వుంది. పాకిస్తాన్‌లోని కరాచీలో జన్మించిన ఆయన దేశ విభజన తర్వాత భారతదేశానికి వచ్చాడు.1962లో ముంబైలో కేంద్రంగా మట్కా గ్యాంబ్లింగ్ లో దేశం మొత్తం పెద్ద నెట్‌వర్క్‌ను సృష్టించాడు.

ఖత్రీ మొదట మరో మట్కా కింగ్ కళ్యాణ్‌జీ భగత్‌తో కలిసి పనిచేశాడు. తర్వాత రతన్ మట్కా అనే తన స్వంత ఆపరేషన్ ప్రారంచాడు. అతని నెట్ వర్క్ సెలబ్రేటీలని సైతం ఆకర్షించింది. చాలా కాలం పాటు గ్యాంబ్లింగ్ లో రారాజుగా వెలిగాడు. ఎమర్జెన్సీ కాలంలో జైలు జీవితం కూడా అనుభవించాడు. ఖత్రీ గ్యాంబ్లింగ్ టెక్నిక్స్ లో మట్కా, ప్లేయింగ్ కార్డ్‌లు తనకి ఒక ప్రత్యేకమైన గుర్తింపుని తెచ్చాయి. సెల్ ఫోన్, ఇంటర్నెట్ లేని రోజుల్లో దేశం మొత్తం అతను నడిపిన బెట్టింగ్ నెట్ వర్క్ అందరినీ ఆశ్చర్యపరిచేలా చేసింది.

ఖత్రీ క్యారెక్టర్ స్ఫూర్తితో మట్కాలో వాసు క్యారెక్టర్ ని డిజైన్ చేశారు డైరెక్టర్ కరుణ కుమార్. ట్రైలర్ లో వరుణ్ తేజ్ గెటప్పులు, వాసు క్యారెక్టర్ పలికిన డైలాగులు ప్రత్యేక ఆకర్షణగా నిలిచాయి. అన్నట్టు ఖత్రీ క్యారెక్టర్ స్ఫూర్తితోనే మట్కా కింగ్ అనే వెబ్ సిరిస్ చేస్తున్నాడు విజయ్ వర్మ. ప్రస్తుతం ప్రొడక్షన్ లో వున్న ఈ సిరిస్ అమెజాన్ ప్రైమ్ లో రిలీజ్ కానుంది.