బాహుబలి ప్రభాస్… న్యాయపోరాటం చేస్తున్నారు. అదీ కూడా ప్రభుత్వంపై చేస్తున్నారు. సుప్రీంకోర్టు తీర్పు పేరుతో… అసలు ఆ తీర్పులో చెప్పినట్లు.. సర్వే నెంబర్లకు.. కానీ… ఇతర అంశాలకు కానీ ఎలాంటి సంబంధం లేకపోయినా… తన స్థలాన్ని ప్రభుత్వ అధికారులు సీజ్ చేశారని… ఆయన ప్రధాన ఆరోపణ. ఇదే అంశాన్ని వివరిస్తూ కోర్టుకు వెళ్లారు. పిటిషన్ పై విచారణ జరుగుతోంది. మరి అది నిజంగానే సుప్రీంకోర్టు తీర్పునకు సంబంధం లేని స్థలమా..? అయితే ప్రభాస్ పై కక్ష గట్టి కావాలనే ఆ స్థలాన్ని సీజ్ చేశారా..? అన్న అనుమానాలు సినీ వర్గాల్లో వినిపిస్తున్నాయి.
రంగారెడ్డి జిల్లా శేరిలింగంపల్లి మండలం రాయదర్గం మక్త గ్రామంలోని సర్వే నంబర్5/3లో ప్రభాస్‌కు చెందిన 2,083 చదరపు అడగుల స్థలం ఉంది. అది ప్రభుత్వం స్థలం అని తీర్పు వచ్చిందంటూ.. హఠాత్తుగా ఆ స్థలాన్ని తహసీల్దార్ సీజ్ చేశారు. దీనిపై ప్రభాస్ కోర్టుకు వెళ్లారు. తాను ఈ స్థలాన్ని 2005లో బి.వైష్ణవీ రెడ్డి, ఉషా, బొమ్మిరెడ్డి శశాంశ్ రెడ్డిల నుంచి తాను చట్టబద్ధంగా కొనుగోలు చేశానని ఈ భూమిపై ఎటువంటి వివాదాలు లేవని ప్రభాస్ తన పిటిషన్‌లో పేర్కొన్నారు. క్రమం తప్పకుండా ఆస్తి పన్ను, విద్యుత్ బిల్లులు చెల్లిస్తున్నానని కోర్టుకు తెలిపారు. ఈ భూమిలో తాత్కాలిక నిర్మాణాలు కూడా ఉన్నాయన్నారు. ఎటువంటి వివాదాలు లేకపోయినా ముందస్తు జాగ్రత్త చర్యగా క్రమబద్ధీకరణ కోసం దరఖాస్తు చేసుకుని రూ. కోటీ ఐదు లక్షల ఫీజు కూడా చెల్లించామని, క్రమబద్ధీకరణ దరఖాస్తు ప్రభుత్వ పరిశీలనలో ఉందని తెలిపారు. అకస్మాత్తుగా రెవెన్యూ అధికారులు వచ్చి తన భూమిని ప్రభుత్వ భూమిగా చెబుతూ, తన ఇంటిని సీజ్ చేశారన్నారు.
సుప్రీంకోర్టు తీర్పులో తాను పార్టీ కాదని, అసలు సుప్రీంకోర్టు తీర్పు గురించి తమకు ఏమీ తెలియదని ప్రభాస్ న్యాయవాది కోర్టుకు తెలిపారు. సుప్రీంకోర్టు తీర్పునకు.. ఆ స్థలానికి ఎలాంటి సంబంధం లేదన్నారు. ఈ తీర్పును బూచిగా చూపుతూ తనను తన స్థలం నుంచి బలవంతంగా ఖాళీ చేయించేందుకు అధికారులు ప్రయత్నిస్తున్నారనేది ప్రభాస్ ఆరోపణ. రెవిన్యూ అధికారులు వేసిన కౌంటర్ పై వాదనలను ఈ నెల 31 న విచారణ జరగనుంది. నిజంగా అది ప్రభుత్వ భూమే అయితే.. ప్రభాస్ పట్టించుకోకపోయేవారని.. కానీ తనపై కక్ష సాధిస్తున్నారన్న ఉద్దేశంతోనే ప్రభాస్ కోర్టుకు వెళ్లాడని అంటున్నారు. అంటే ఈ విషయంలో… సుప్రీంకోర్టు తీర్పు నేపధ్యంగా..ఏదో జరుగుతోందన్న విషయం మాత్రం స్పష్టమవుతోందంటున్నారు. అదేమిటో బయటకు తేలాల్సి ఉంది.
