రఘురామ్ సిమెంట్స్ అలియాస్ భారతి సిమెంట్స్ క్విడ్ ప్రో కో వ్యవహారంలో.. సీబీఐ 2013లోనే చార్జిషీట్ దాఖలు చేసింది. ఇతర సీబీఐ చార్జిషీట్లను ఆధారంగా చేసుకుని … ఈడీ అప్పటికప్పుడు చార్జిషీట్లు దాఖలు చేసింది. కానీ భారతి సిమెంట్స్ విషయంలో మాత్రం ఆలస్యం చేసింది. ఆ కంపెనీ వ్యవహారంలో ఈడీకి సాక్ష్యాలు ఏమీ దొరకలేదని అనుకున్నారు అందరూ. కానీ హఠాత్తుగా.. నెల రోల కిందట… ఈ వ్యవహారానికి సంబంధించి చార్జిషీటు దాఖలు చేసింది. అది రెండు రోజుల కిందట మీడియాకు తెలిసింది. ఈ గ్యాప్‌నే చూపించి జగన్మోహన్ రెడ్డి.. కుట్ర జరిగిందనే విషయాన్ని బలంగా ప్రజల్లోకి తీసుకెళ్లే ప్రయత్నం చేస్తున్నారు. కానీ ఈడీ అధికారులు అంత కంటే ప్లానింగ్‌తోనే ఉన్నట్లు తెలుస్తోంది.

ప్రస్తుతం కడప జిల్లాలో ఉన్న భారతి సిమెంట్స్ సంస్థ ..మొదట రఘురాం సిమెంట్స్ గా ఉండేది. కొన్ని మైనింగ్ లీజులు తీసుకుని పేపర్లపైనే ఉన్న ఆ సంస్థను… వైఎస్ ముఖ్యమంత్రి అయిన కొన్నాళ్లకే జగన్ కొనుగోలు చేశారు. ఆ సంస్థ పేరును తన భార్య భారతి పేరుపైకి మార్చారు. ఆమెను కీలక వాటాదారుగా చేశారు. ఆ తర్వాత ఆ సంస్థలోకి పెట్టుబడుల వరద వచ్చి పడింది. ఈ కంపెనీ కోసం జగన్ పెట్టిన పెట్టుబడి.. లక్షల్లోనే ఉంది. వచ్చిన పెట్టుబడులు మాత్రం వందల కోట్లకు చేరాయి. ఉత్పత్తి ప్రారంభం అవగానే.. ఈ కంపెనీలో 51 శాతం వాటాను ఫ్రాన్స్ కు చెందిన వికాట్ కు దాదాపుగా రెండు వేల కోట్ల రూపాయలకు అమ్మేశారు. అప్పుడప్పుడే ఉత్పత్తి ప్రారంభించిన కంపెనీని .. అంత పెద్ద మొత్తం పెట్టి కొనుగోలు చేయడం అనుమానాలకు తావిచ్చింది. మెజార్టీ షేర్ ఫ్రాన్స్ కు చెందిన వికాట్ కంపెనీ చేతుల్లో ఉన్నప్పటికీ.. ఆ కంపెనీ తరపున భారతి సిమెంట్స్ బోర్డులో నామమాత్రపు ప్రతినిధులే ఉన్నారు. జగన్ కుటుంబంలోని వ్యక్తులే.. ప్రస్తుతం భారతీ సిమెంట్స్ మొత్తాన్ని నడిపిస్తున్నారు.

రఘురామ్ సిమెంట్ ఎదుగుదలపై లోతుగా దర్యాప్తు చేసిన ఈడీ.. మొత్తం గుట్టు బయటకు లాగినట్లు ప్రచారం జరుగుతోంది. విదేశాల నుంచి రావాల్సిన సమాచారం కోసం . ఈడీ గతంలోనే.. ఆయా దేశాలకు లేఖలు రాసింది. వాటికి సంబంధించిన సమాచారం అందడం వల్లే .. ఐదేళ్ల తర్వాత ఇప్పుడు చార్జిషీట్ దాఖలు చేసినట్లు తెలుస్తోంది. వికాట్ కంపెనీ పెట్టుబడులు… వాటిని భారత్ కు తీసుకురావడం.. అలాగే భారతి సిమెంట్స్ లో ఇండియా సిమెంట్స్ తో పాటు.. ఇతర క్విడ్ ప్రో కో పెట్టుబడులు గురించిన మొత్తం సమాచారం సేకరించిన తర్వాతే ఈడీ చార్జిషీట్ దాఖలు చేసినట్లు ప్రచారం జరుగుతోంది. నెల రోజులుగా కోర్టు పరిశీలనలో కేసు ఉంది. మరో రెండు, మూడు వారాల్లో సీబీఐ కోర్టు ఈ చార్జిషీటును పరిగణనలోకి తీసుకుని… సమన్లు జారీ చేసే అవకాశం ఉందని… న్యాయవాద వర్గాలు అంచనా వేస్తున్నాయి.