టాలీవుడ్ లో హీరోలంతా య‌మా బిజీగా ఉన్న ద‌శ ఇది. చేతిలో ఒక‌టీ అరా విజ‌యాలు ఉన్న ‘యావ‌రేజ్’ హీరోలు సైతం.. త‌మ ఆధిప‌త్యం చూపిస్తున్నారు. చేతి నిండా సినిమాల‌తో హ‌డావుడి చేస్తున్నారు. వీళ్ల మధ్య నాగ‌శౌర్య ప‌రిస్థితి కాస్త విచిత్రంగా తోస్తోంది. ల‌వ్ స్టోరీల‌కూ, ఫ్యామిలీ డ్రామాల‌కూ, ఎంట‌ర్‌టైన్‌మెంట్ చిత్రాల‌కూ బాగా స‌రిపోయే యూత్ ఫుల్ హీరో నాగ‌శౌర్య. త‌న‌కు ‘ఊహ‌లు గుస‌గుస‌లాడే’, ‘చ‌లో’ లాంటి హిట్స్ ఉన్నాయి. యేడాదికి రెండు మూడు సినిమాలు చేసేవాడు. అయితే ఇప్పుడు మాత్రం ఫుల్ ఖాళీ.
‘రంగ‌బ‌లి’ త‌ర‌వాత శౌర్య మ‌రో క‌థ ఒప్పుకోలేదు. ఆ సినిమాపై చాలా ఆశ‌లు పెట్టుకొన్నాడు శౌర్య. కానీ ఫ‌లితం రాలేదు. దాంతో కాస్త నిరుత్సాహానికి లోనైన‌ట్టు తెలుస్తోంది. శౌర్య ద‌గ్గ‌ర‌కు క‌థ‌లు చాలానే వెళ్తున్నాయి. నిర్మాత‌లూ ఉన్నారు. కానీ ఎలాంటి క‌థ‌ల్ని ఎంపిక చేసుకోవాలో తెలీని సందిగ్థంలో నాగ‌శౌర్య ఉన్న‌ట్టు టాక్‌. గ‌తేడాదే శౌర్య పెళ్ల‌య్యింది. అందుకే ఫ్యామిలీకీ కాస్త టైమ్ కేటాయిస్తున్నాడ‌ట. సినిమాల విష‌యంలో తొంద‌ర ప‌డ‌డం లేద‌ని, గ‌న్ షాట్ గా హిట్ కొట్టే క‌థ కోసం ఎదురు చూస్తున్నాడ‌ని శౌర్య స‌న్నిహితులు చెబుతున్నారు. చేతిలో సొంత నిర్మాణ సంస్థ ఉండ‌నే ఉంది. మంచి క‌థ దొరికితే నిర్మాత‌ని కూడా వెదుక్కోవాల్సిన ప‌నిలేదు. అదే.. శౌర్య ధీమా.
