ఏజెంట్ మరికొన్ని గంటల్లో ప్రేక్షకుల ముందుకు వచ్చేస్తుంది. ప్రీ రిలీజ్ ప్రమోషన్ కార్యక్రమాలు దాదాపు పూర్తయినట్లే. అఖిల్, అనిల్ సుంకర, హీరోయిన్ సాక్షి మీడియాకి ఇంటర్వ్యూలు ఇచ్చేశారు. అయితే ఏజెంట్ ప్రమోషన్స్ లో కెప్టెన్ సురేందర్ రెడ్డి మాత్రం కనిపించలేదు. ఈ మొత్తం ప్రచారంలో వరంగల్ ఈవెంట్ లో మాత్రమే కనిపించారు సురేందర్ రెడ్డి.
ఏజెంట్ షూటింగ్ చాలా ఆలస్యమైయింది. బడ్జెట్ కూడ పెరిగింది. సురేందర్ రెడ్డి కూడా ఒక నిర్మాతగా భాగస్వామ్యం పంచుకున్నారు. సంక్రాంతి బరిలోనే ఈ సినిమాని దించుదామని అనుకున్నారు. కానీ కుదరలేదు. ఇప్పుడు ఏప్రిల్ 28 డేట్ కూడా ప్రమోషన్స్ కి సరిపోలేదు.
దీనంతటికీ కారణం.. ఏజెంట్ చివరి క్షణం వరకూ ఎడిటింగ్ టేబుల్ మీద వుండే పరిస్థితి రావడం. నిర్మాత అనిల్ సుంకర కూడా తన కెరీర్ లో చాలా ఒత్తిడితో విడుదల చేస్తున్న సినిమా ఇదని అభిప్రాయపడ్డారు. సురేందర్ చివరి వరకూ అవుట్ పుట్ ని ఫైనల్ చేసే పనిలోనే వున్నారు. అందుకే ప్రమోషన్స్ లో ఆయన కనిపించడం కుదరలేదు. మరి పోస్ట్ రిలీజ్ ప్రమోషన్స్ లోనైనా సురేందర్ రెడ్డి కనిపిస్తారేమో చూడాలి.
