పోచారం శ్రీనివాస్ రెడ్డి, సంజయ్ కుమార్.. నెక్స్ట్ కాంగ్రెస్ లో చేరే బీఆర్ఎస్ ఎమ్మెల్యే ఎవరు..? రాష్ట్రవ్యాప్తంగా జరుగుతోన్న చర్చ ఇది. చాలామంది ఎమ్మెల్యేలు బీఆర్ఎస్ ను వీడెందుకు రంగం సిద్దం చేసుకున్నారని, సీఎం రేవంత్ రెడ్డి అనుమతి కోసం వేచి చూస్తున్నారన్న ప్రచారం జరుగుతోంది.
ఈ నేపథ్యంలోనే నెక్స్ట్ గద్వాల ఎమ్మెల్యే కృష్ణమోహన్ రెడ్డి కాంగ్రెస్ లో చేరే అవకాశం ఉందన్న కొద్ది రోజులుగా వార్తలు వస్తున్నాయి. ఇదివరకే కాంగ్రెస్ లో చేరేందుకు సిద్దమైనా జడ్పీ చైర్మన్ సరిత తిరుపతయ్య అలకతో ఆయన చేరిక చివరి నిమిషంలో వాయిదా పడింది. తాజాగా ఆమె పదవి కాలం గురువారం ముగియనుండటంతో ఇక, కృష్ణ మోహన్ రెడ్డి కాంగ్రెస్ లో చేరుతారని కాంగ్రెస్ వర్గాలు అభిప్రాయపడుతున్నాయి.
వారం రోజుల్లో కృష్ణమోహన్ రెడ్డి కాంగ్రెస్ లో చేరుతారని సోషల్ మీడియాలో జోరుగా ప్రచారం జరుగుతోంది. అయితే, పార్టీ మార్పు వార్తలను కృష్ణమోహన్ రెడ్డి కొట్టిపారేస్తున్నారు. కాంగ్రెస్ లో చేరే విషయంపై ఇంకా ఎలాంటి నిర్ణయం తీసుకోలేదని తెలిపారు.
ఇటీవల కాంగ్రెస్ లో చేరిన ఎమ్మెల్యేలు కూడా పార్టీ మార్పు విషయాన్ని చివరి వరకు గోప్యంగానే ఉంచారు. ఇప్పుడు కృష్ణమోహన్ రెడ్డి సైతం అదే పంథాను అనుసరిస్తున్నారని అందుకే.. ఈ వార్తను కొట్టిపారేస్తున్నారని అంటున్నారు.
