ఇది వ‌ర‌కు కన్నడ డ‌బ్బింగ్ సినిమాల్ని పెద్ద‌గా ప‌ట్టించుకొనేవారు కాదు. ఎప్పుడైతే కేజీఎఫ్‌, కాంతార‌లు అద్భుతాలు సృష్టించాయో, అప్ప‌టి నుంచీ… కన్నడ డ‌బ్బింగుల‌పై ఆస‌క్తి పెరిగింది. ఈ దీపావ‌ళికి కన్నడ నుంచి ఓ సినిమా వ‌స్తోంది. అదే.. ‘బ‌ఘీర’. ‘కేజీఎఫ్‌’, ‘కాంతార’ చిత్రాల్ని అందించిన హోంబ‌లే ఫిల్మ్స్ ఈ చిత్రాన్ని నిర్మించింది. అంతే కాదు.. ఈ చిత్రానికి ప్ర‌శాంత్ నీల్ క‌థ‌ని అందించ‌డం విశేషం. యాక్ష‌న్ ప్ర‌ధానంగా సాగే సినిమా ఇది. టీజ‌ర్ లో మేకింగ్ క్వాలిటీ క‌నిపించింది. ప్ర‌శాంత్ నీల్ క‌థ‌ల్లో హీరోయిజం పుష్క‌లంగా ఉంటుంది. ఇందులో హీరో పోలీస్ ఆఫీస‌ర్‌. ఇక.. ఆ హీరోయిజాన్ని ఏ స్థాయిలో చూపించాడో అర్థం చేసుకోవొచ్చు. శ్రీముర‌ళి క‌థానాయ‌కుడిగా న‌టించిన ఈ చిత్రానికి సూరి ద‌ర్శ‌కుడు.
దీపావ‌ళి సంద‌ర్భంగా ఈనెల 31న విడుద‌ల అవుతోంది. ఈరోజే తెలుగు నుంచి ‘ల‌క్కీ భాస్క‌ర్‌’, ‘క’ చిత్రాలు వ‌స్తున్నాయి. మ‌రో రెండు సినిమాలు కూడా విడుద‌ల‌కు సిద్ధ‌మ‌య్యాయి. పోటీ గ‌ట్టిగానే ఉంది. కాక‌పోతే…ప్ర‌శాంత్ నీల్ ఇమేజ్‌, టీజ‌ర్ చూపించిన ఇంపాక్ట్ వ‌ల్ల యాక్ష‌న్ ప్రియులు ఈ సినిమాపై ఓ లుక్ వేసే అవ‌కాశం ఉంది. కాంతార ఫేమ్‌ అజ‌నీష్ లోక్‌నాథ్ ఈ చిత్రానికి సంగీతం అందిస్తున్నారు. ఈనెల 17న ఈ చిత్రం నుంచి తొలి పాట విడుద‌ల కానుంది. తెలుగులో ఈ చిత్రాన్ని ఏసియ‌న్ సురేష్ ఎంట‌ర్‌టైన్‌మెంట్స్ సంస్థ విడుద‌ల చేస్తోంది కాబ‌ట్టి మంచి థియేట‌ర్లే ద‌క్కే అవ‌కాశం ఉంది.
