మ‌హేష్ బాబు పుట్టిన రోజు వ‌చ్చేస్తోంది. ఈనెల 9న సూప‌ర్ స్టార్ బ‌ర్త్ డే. చేతిలో గుంటూరు కారం సినిమా ఉంది. రాజ‌మౌళితో ప్రాజెక్ట్ ఓకే అయ్యింది. రాజ‌మౌళి సినిమాకి ఇంకా చాలా టైమ్ ఉంది కాబ‌ట్టి, ఈ బ‌ర్త్ డే కానుక‌గా గుంటూరు కారం నుంచి ఓ పాట వ‌స్తుంద‌ని అంతా భావిస్తున్నారు. త‌మ‌న్ కూడా పాట‌లు సిద్ధం చేస్తున్నాడు. కాక‌పోతే.. ఈ ట్యూన్స్ విష‌యంలో మ‌హేష్ ఇప్ప‌టికీ అసంతృప్తితోనే ఉన్నాడ‌ని టాక్. త‌మ‌న్ ఇప్ప‌టికే కొన్ని ట్యూన్లు పంపాడు. కానీ మ‌హేష్ ఏదీ ఓకే చేయ‌లేదు. కాబ‌ట్టి.. ఈ పుట్టిన రోజుకి పాట వ‌చ్చే అవ‌కాశాలు అంతంత మాత్రంగానే క‌నిపిస్తున్నాయి. దానికి త‌గ్గట్టుగానే చిత్ర‌బృందం కూడా బ‌ర్త్ డే స్పెష‌ల్ పై ఇప్ప‌టి వ‌ర‌కూ స్పందించ‌లేదు. పాట రెడీ కాక‌పోతే.. ఏం చేయాలి? అనే విష‌యంలో చిత్ర‌బృందం ద‌గ్గ‌ర ఓ ప్లాన్ బి కూడా ఉంద‌ని టాక్‌. ఓ చిన్న సైజు టీజ‌ర్‌ని వ‌దిలితే బాగుంటుంద‌ని ఫిక్స‌యి, ఆ దిశ‌గానూ ప్ర‌య‌త్నాలు మొద‌లెట్టార్ట‌. ఇది వ‌ర‌కు విడుద‌ల చేసిన టీజ‌ర్ ఫుల్ మాసీగా ఉంది. ఈసారి మాత్రం క్లాస్ ట‌చ్‌తో ఓ టీజ‌ర్ వ‌దిలే అవ‌కాశం ఉంది. ఈ సినిమా నుంచి త‌మ‌న్‌ని తొలగించారని, ఇంకో సంగీత ద‌ర్శ‌కుడి కోసం అన్వేషిస్తున్నార‌ని చాలా రోజుల క్రిత‌మే ప్ర‌చారం మొద‌లైంది. దాన్ని త‌మ‌న్ కూడా ఖండిచాడు. త‌మ‌న్ ఇంకా ఈ టీమ్‌లో ఉన్నాడ‌ని నిరూపించుకోవ‌డానికైనా ఓ పాట బ‌య‌ట‌కు రావాలి. కానీ.. మ‌హేష్ క‌నిక‌రించ‌డం లేదు.