విపక్ష కూటమి నేతలు తమ కూటమికి ఏ ప్లాన్ తో ఇండియా కూటమి అని పేరు పెట్టుకున్నారో కానీ ఆ పేరుకు మూడిపోయింది. అసలు మన దేశం పేరు ఇండియానే కాదని.. భారత్ అని కేంద్రం చెబుతోంది. ప్రపంచ దేశాలకు ఇప్పటికే జీ 20 సమావేశం సందర్భంగా పంపిన ఆహ్వానలేఖల్లో ప్రెసిడెంట్ ఆఫ్ ఇండియా ప్లేస్ ప్రెసిడెంట్ ఆఫ్ భారత్ అని ముద్రించారు. అదే సమయంలో.. పార్లమెంట్ ప్రత్యేక సమావేశాల్లో ఈ మేరకు బిల్లు పెట్టేందుకు అన్ని ఏర్పాట్లు జరుగుతున్నట్లుగా బయటకు పొక్కింది. దీనిపై బీజేపీ నేతలు కూడా నర్మగర్భంగా మాట్లాడుతున్నారు. తాము భారతీయులమని.. తమది భారతదేశమని అంటున్నారు. ఇండియా అనే మాట రానివ్వడం లేదు.

ప్రపంచంలో ఇండియా అనే పేరుతోనే మన దేశం తరపున లావాదేవీలు జరుగుతాయి. మన దేశంలో మాత్రం భారత్ అని ప్రస్తావిస్తూ వస్తాం. అంతర్జాతీయ వేదికపై ఇండియాగానే అభివర్ణిస్తారు. ఐక్యరాజ్యసమితిలోనూ ఇండియా అనే ఉంటుంది. ఇప్పుడు ఆ పేరును భారత్ అని మార్చేందుకు కేంద్రం సిద్ధమైనట్లుగా తాజా పరిణామాలు నిరూపిస్తున్నాయి. దీనికి కారణం ఇండియా కూటమి అని ప్రత్యేకంగా చెప్పాల్సిన పని లేదు. వచ్చే ఎన్నికలు ఇండియా వర్సెస్ బీజేపీ అన్నట్లుగా జరుగుతాయని.. లఇది ఓటర్లపై ఎమోషనల్ బ్లాక్ మెయిలింగ్ కు పాల్పడినట్లుగా ఉంటుందన్న ఉద్దేశంతో భారత్ పేరును మార్చేయాలని డిసైడయ్యారని అనుకోవచ్చు.

పేరు మార్పు అనేది బీజేపీ ఓ ఉద్యమంలా చేపడుతోంది. యూపీలో సహా అనేక రాష్ట్రాల్లో ముస్లింపేర్లు ఉన్న సిటీల పేర్ల మార్చేసింది. ఆగ్రా పేరు ఇప్పుడు ఆగ్రా కాదు.. అలహాబాద్ పేరు ఇప్పుడు అలహాబాద్ కాదు.. కొత్త కొత్త పేర్లు చాలా వచ్చాయి. అయితే ఇప్పుడు ఏకంగా ఇండియా పేరు అంటే.. దేశం పేరునే మార్చేస్తూండటం మాత్రం… అందరికీ కాస్త వింతగానే అనిపిస్తుంది. పాలకులు ఏం చేయాలనుకుంటే అది చేయగలరు మరి.