ఈరోజు నాగ‌చైత‌న్య పుట్టిన రోజు. ఈ యేడాది చైతూకి చాలా కీల‌కం. ఓ వైపు `తండేల్` లాంటి భారీ సినిమా వుంది. మ‌రో వైపు వ్య‌క్తిగ‌త జీవితంలోనూ ఓ మ‌లుపు రాబోతోంది. శోభిత ధూళిపాళ తో చైత‌న్య పెళ్లి ఫిక్స‌యిన సంగ‌తి తెలిసిందే. అలా వృత్తిగ‌త‌, వ్య‌క్తిగత జీవితాల్లో కీల‌క‌మైన అడుగులు వేయ‌బోతున్నాడు చైతూ. దానికి తోడు `విరూపాక్ష‌` ద‌ర్శ‌కుడితో ఓ సినిమా ఓకే అయ్యింది. ఇది కూడా భారీ సినిమానే. చైత‌న్య బిగ్ లీగ్‌లోకి చేర‌డానికి ఇదే స‌రైన స‌మ‌యం. `తండేల్‌`పై చిత్ర‌బృందం భారీ ఆశ‌లే పెట్టుకొంది. ఈ సినిమా ఎట్టి ప‌రిస్థితుల్లోనూ రూ.100 కోట్ల మార్క్ చేరుకొంటుంద‌ని నిర్మాత బ‌న్నీ వాస్ గ‌ట్టి న‌మ్మ‌కంతో చెబుతున్నారు. ఈ సినిమా అవుట్ పుట్ చూసుకొన్న త‌ర‌వాత చిత్ర‌బృందానికి మ‌రీ న‌మ్మ‌కాలు పెరిగిపోయాయి. క‌థా నేప‌థ్యం, చైతూ క్యారెక్ట‌రైజేష‌న్‌, చందూ మొండేటి టేకింగ్, దేవిశ్రీ ప్ర‌సాద్ సంగీతం.. వీట‌న్నింటికీ తోడు సాయి ప‌ల్ల‌వి క్రేజ్‌… `తండేల్‌`ని సూప‌ర్ హిట్ సినిమాగా మారుస్తుంద‌ని అక్కినేని అభిమానులు సైతం న‌మ్ముతున్నారు.

చైతూ కెరీర్‌లో హిట్లు, ఫ్లాపులూ రెండూ ఉన్నాయి. అయితే… త‌న‌కో బ్లాక్ బస్ట‌ర్ హిట్ కావాలి. నాని, విజ‌య్‌దేవ‌ర‌కొండ లాంటి హీరోలు చూసిన భారీ విజ‌యాల్ని నాగ‌చైత‌న్య నుంచి అభిమానులు ఆశిస్తున్నారు. అది తండేల్ ఇవ్వ‌గ‌ల‌దు కూడా. ఈమ‌ధ్య చైత‌న్య క‌థ‌ల ఎంపిక‌లో కూడా చాలా మార్పులు క‌నిపిస్తున్నాయి. రెగ్య‌లర్ ల‌వ్ స్టోరీలు, యాక్ష‌న్ క‌థ‌ల‌కు చెక్ పెడుతున్నాడు. ఇటీవ‌ల నాలుగైదు క‌థ‌ల్ని రిజెక్ట్ చేశాడు. అందులో అన్న‌పూర్ణ స్టూడియోస్‌లో చేయాల్సిన సినిమా కూడా వుంది. ఈ క‌థ‌ని సైతం ప‌క్క‌న పెట్టాడు. త‌న ఫోక‌స్ అంతా ఇప్పుడు తండేల్ పైనే ఉంది. ఈ సినిమా చైతూ కెరీర్‌ని ఏ ద‌శ‌లో న‌డిపిస్తుందో చూడాలి. అన్న‌ట్టు హ్యాపీ బ‌ర్త్ డే చైతూ.