కాంగ్రెస్ పార్టీతో కలిసి మహాకూటమిలో భాగంగా మారి… తెలంగాణ రాష్ట్ర సమితి ప్రభుత్వాన్ని ఓడించాలన్న పట్టుదల కనబరిచిన… తెలంగాణ జన సమితి అధినేత ప్రొ.కోదండరాం.. ఇప్పుడు భారతీయ జనతా పార్టీతో చర్చలు జరుపుతున్నారు. కాంగ్రెస్ పార్టీ.. టీజేఎస్‌కు కేవలం మూడు అంటే.. మూడు సీట్లు మాత్రమే ఇస్తమనే ప్రతిపాదన పెట్టడంతో.. కోదండరాం అసంతృప్తికి గురయ్యారు. వెంటనే తన దగ్గర ప్లాన్ బీ ఉందని చెబుతున్న ఆయన… దాన్ని అమలు కూడా ప్రారంభించారు. బీజేపీ నేతలతో కోదండరామ్ వరుస రహస్యంగా సమావేశం అవుతున్నట్లు ప్రచారం జరుగుతోంది. దత్తాత్రేయతో గంట పాటు చర్చలు జరిపారని బీజేపీ వర్గాలు చెబుతున్నాయి.

మహాకూటమిలో గెలిచే స్థానాలు వదులుకోకూడదని కాంగ్రెస్ భావిస్తోంది. కానీ తమకు కనీసం పదిహేడు స్థానాలు కావాలని జనసమితి డిమాండ్ చేస్తోంది. జనసమితికి అంత బలం లేదని .. టిక్కెట్లు ఇస్తే.. చేజేతులా.. టీఆర్ఎస్‌కు అప్పగించినట్లేనన్న ఆందోళన కాంగ్రెస్ పార్టీలోఉంది. కోదండరాంతో చర్చల విషయాన్ని ఆ పార్టీ నేత కిషన్ రెడ్డి… అంగీకరించారు. తెలంగాణ జన సమితితో పొత్తుపై ఇంకా క్లారిటీ రాలేదని, చర్చలు జరుగుతున్నాయని మాత్రం ఆఫ్ ది రికార్డుగా మీడియాకు చెప్పారు. తెలంగాణ పునర్నిర్మాణంలో కోదండరాం కీలకపాత్ర పోషించాలనుకుంటున్నారు. కూటమిలో సర్థుకుపోదామనుకున్నా‌‌.. రాబోయే ప్రభుత్వం తన ఆశయాలకు అనుగుణం నడుస్తోన్న గ్యారంటీ లేదు. అందుచేత మహాకూటమికి కనీస ఉమ్మడి కార్యక్రమం రూపొందించాలనీ.‌. కూటమిలో చేరుతున్నందుకు పరిహారంగా కామన్ మినిమం ప్రోగ్రాం తయారు చేసే ఛైర్మన్ గా అయినా ఉందామని కోదండరాం ఆశించారు.

కానీకాంగ్రెస్ దీనిపై ఏ విషయమూ చెప్పడం లేదు. అందుకే కోదండరాం ఏం నిర్ణయం తీసుకోవాలా అని ఆలోచిస్తున్నారు. కేసీఆర్ ను ఓడించాలన్న తన ఆశయం నెరవేరాలంటే.. తనొక్కడితో సాధ్యం కాదు. కానీ సీట్ల దగ్గర తేడా వస్తోంది. జనసమితి.. కనీసం 35స్థానాలకు పోటీ చేయాలనుకుంది. కానీ చివరికి 17 స్థానాలకు దిగింది. కాంగ్రెస్ మరీ మూడు స్థానాలు అంటోంది. అందుకే బీజేపీతోనూ చర్చలు జరుపుతున్నారు. కానీ ఆయన స్పందన మాత్రం ఇంకా బయటకు తెలియడం లేదు.