విశాఖలో టీడీపీ ఎమ్మెల్యే వెలగపూడి రామకృష్ణబాబు ఆఫీసుపైకి వెళ్లిన వైసీపీ కార్యకర్తలు పోలీసులపై దాడికి తెగబడటం ఇప్పుడు వివాదాస్పదమవుతోంది. అక్కడ పోలీసులపై వైసీపీ కార్యకర్తలు దురుసుగా వ్యవహరించారు. రామకృష్ణబాబు కార్యాలయంపై దాడి చేయకుండా అడ్డుకునే ప్రయత్నంలో ఉన్న పోలీసులపై ఎదురుదాడి చేశారు. ఆ దృశ్యాలు, ఫోటోలు సోషల్ మీడియాలో వైరల్ అయ్యాయి. వైసీపీ కార్యకర్తలు హద్దులు దాటిపోతున్నారని పోలీసుల్ని లెక్క చేయడం లేదన్న విమర్శలు వచ్చాయి. అయితే అనూహ్యంగా.. ఏపీ పోలీసు శాఖ అధికారిక సోషల్ మీడియా అకౌంట్‌లో దీనిపై స్పందించింది. పోలీసులపై వైసీపీ కార్యకర్తలు దాడులు చేయలేదని.. పోలీసు కింద పడితే పైకి లేపి మసాజ్ చేస్తున్నారని చెప్పుకొచ్చింది.

ఫ్యాక్ట్ చెక్ పేరుతో పోలీసులు ఇచ్చిన వివరణ చూసి.. సోషల్ మీడియాలో సెటైర్లు ప్రారంభమయింది. అసలు వెలగపూడి రామకృష్ణబాబు ఆఫీసు దగ్గర ఏం జరిగిందో.. మొత్తం వీడియోల్ని పోస్ట్ చేయడం ప్రారంభించారు. టీడీపీ నేత నారా లోకేష్ కూడా .. పోలీసుల్ని నెట్టేస్తున్న వైసీపీ కార్యకర్తల వీడియోల్ని సోషల్ మీడియాలో పోస్ట్ చేశారు. వైసీపీ కార్యకర్తలతో తన్నించుకుని… బాడీ మసాజ్ చేయించుకున్నామని చెప్పుకోవడం ఏమిటని.. మళ్లీ దానికి ఫ్యాక్ట్ చెక్ పేరుతో… సమర్థించుకోవడం ఏమిటని ఆయన ప్రశ్నించారు. పోలీసుల ఆత్మగౌరవాన్ని జగన్మోహన్ రెడ్డి కాళ్ల దగ్గర పెట్టవద్దని ఆయన సూచించారు.

కొద్ది రోజుల క్రితం.. సోషల్ మీడియాలో పోస్ట్ పెట్టారని పొన్నూరులో దళిత టీడీపీ కార్యకర్తను పోలీసులు అదుపులోకి తీసుకున్నారు. ఆ సమయంలో నారా లోకేష్‌ పోలీసులపై మండిపడ్డారు. అప్పుడు కూడా గుంటూరు అర్బన్ ఎస్పీ ఫ్యాక్ట్ చెక్ పేరుతో ఎవర్నీ అదుపులోకి తీసుకోలేదని ప్రకటించారు. తర్వాత పోలీస్ స్టేషన్ సీసీ విజువల్స్ బయట పెట్టాలనిలోకేష్ సవాల్ చేశారు. తర్వాత పోలీసులు మాట మార్చారు. ప్రశ్నించడానికి పోలీస్ స్టేషన్‌కు పిలిపించామని చెప్పారు. అప్పుడే పోలీసుల తీరుపై విమర్శలు వచ్చాయి. ఇప్పుడు.. తమపై దాడి చేసినా.. మసాజ్ చేశారని చెప్పుకుంటూ.. పోలీసుల అధికారిక సోషల్ మీడియాలో పెట్టిన పోస్ట్.. వైరల్‌గా మారింది. ఇక వైసీపీ నేతలు ఏం చేసినా.. మసాజ్ చేశారని సరి పెట్టుకుంటారని నెటిజన్లు సెటైర్లు వేస్తున్నారు.