కుప్పం, పిఠాపురం…ఈ రెండు నియోజకవర్గాల్లో చంద్రబాబు, పవన్ కళ్యాణ్ ను ఓడించేందుకు వైసీపీ కుట్రలకు పదును పెడుతోంది. చంద్రబాబుపై ఎంత బురద జల్లుతున్నా అవేవీ ప్రజలు విశ్వసించడం లేదు. దీంతో పిఠాపురంలో పవన్ ను ఓడించేందుకు వైసీపీ తెరవెనక పావులు కదుపుతోంది. ప్రజలను కన్ ఫ్యూజ్ చేసేందుకు బ్యాలెట్ పేపర్లను రిలీజ్ చేసినట్లుగా జనసేన వర్గాలు ఆరోపిస్తున్నాయి.
పిఠాపురంలో పవన్ కళ్యాణ్ గాజు గ్లాస్ గుర్తుపై పోటీ చేస్తుండగా…కోనేటి పవన్ కళ్యాణ్ గాజు గ్లాస్ ను పోలి ఉండేలా బకెట్ గుర్తు, కనుమూరి పవన్ కళ్యాణ్ అనే వ్యక్తి గాజు గ్లాస్ తరహాలో మరో గుర్తుపై పోటీ చేస్తున్నట్లు ఓ బ్యాలెట్ నమూనా బయటకు వచ్చింది. ఎన్నికల పోలింగ్ కు ఇంకా సమయం ఉండటంతో ఇప్పటికిప్పుడు బ్యాలెట్ నమూనా బయటకు వచ్చే అవకాశం లేదు. కానీ, ఈ బ్యాలెట్ బయటకు రావడం చర్చనీయాంశం అవుతోంది.
ఇది ఖచ్చితంగా వైసీపీ సోషల్ మీడియా పనేననీ…ప్రజలను గందరగోళంలో పడేసేందుకు ఇలాంటి చీప్ ట్రిక్స్ ప్లే చేస్తుందన్న ఆరోపణలు చేస్తున్నాయి జనసేన వర్గాలు. ఒకే గుర్తును పోలిన గుర్తులు మరో అభ్యర్థికి కేటాయించడం ద్వారా ముఖ్యంగా వృద్దులు కన్ ఫ్యూజ్ అవుతారు. ఈ ప్లాన్ తోనే వైసీపీ బ్యాలెట్ నమూనాను తీసుకొచ్చిందని అంటున్నారు. అయినా, ఈ విధమైన కుట్రలు చేసినా ప్రజలను జాగృతం చేసి పవన్ ను గెలుపిస్తామని జనసేన లీడర్లు స్పష్టం చేస్తున్నారు.
