ఐదేళ్ల కిందట వంద ఆదాయం ఉంటే.. ఇప్పుడు కూడా అదే ఆదాయం ఉంటే… ఆర్థిక పరిభాషలో ఆదాయం తగ్గినట్లే. ఎందుకంటే ఐదేళ్ల కిందట ఉండే ధరలు ఇప్పుడు ఉండవు. అప్పట్లో వందకు నాలుగు కేజీల బియ్యం వస్తే ఇప్పుడు రెండు కేజీలు కూడా రావు. అంటే పతనమైనట్లే. ఏపీ ఆర్థిక పరిస్థితి కూడా ఇంతే ఉంది. ప్రభుత్వ నిర్వాకాలతో ఆదాయం పెరగకపోగా విచ్చలవిడిగా అప్పులు చేస్తూ.. రాష్ట్రాన్ని దివాలా తీయించడానికి సిద్ధం చేశారు.

ఏపీకి సొంత ఆదాయం తగ్గడం, కేంద్రం నుంచి రావాల్సిన గ్రాంట్లు రాకపోవడంతో ఆర్థిక సంవత్సరం తొలి తొమ్మిది నెలల్లోనే దివాలా చాయలు కనిపించాయి. ఏకంగా రూ.90 వేల కోట్ల వరకు లోటు నెలకొంది. అప్పులు చేస్తున్నా, కేంద్రం నుంచి వస్తున్న నిధులు 50 శాతం వరకే ఉండడంతో దాని ప్రభావం ఎక్కువగానే కనిపిస్తోంది. రిజర్వ్‌బ్యాంకు వెల్లడించిన నివేదిక మేరకు 12 నెలల కాలానికి గానూ బడ్జెట్‌లో ఆమోదించిన గణాంకాలకు, డిసెంబరు వరకు వచ్చిన గణాంకాలకు మధ్య పొంతన లేదు. ఏడాదికి రూ.2,79,279 కోట్లు ఆదాయం వస్తుందని బడ్జెట్‌లో పొందుపరచగా, తొలి తొమ్మిది నెలల్లో కేవలం రూ.1,88,862 కోట్లు వచ్చినట్లు తేలింది.

ఇందులో సొంత పన్నుల ద్వారా వచ్చే ఆదాయం రూ.1,02,651 కోట్లుగా అంచనా వేయగా, ఇప్పటి వరకు రూ.91,136 కోట్లు మాత్రమే చేతికందింది. పన్నేతర ఆదాయం రూ.15,400 కోట్లకు గానూ, రూ.3,971 కోట్లు మాత్రమే వచ్చినట్లు తేలింది. కేంద్రం నుంచి రావాల్సిన వాటిలో కోతలు కేంద్రం నుంచి గ్రాంట్ల రూపేణా రావాల్సిన నిధుల్లో గణనీయంగా కోతలు పడడం ఖజానాకు సమస్యగా మారింది. ఏడాది మొత్తానికి రూ.46,836 కోట్లు వస్తుందని అంచనా వేసుకున్నప్పటికీ తొమ్మిది నెలల్లో కేవలం రూ.24 వేల కోట్లే రావడంతో అధికారులు కంగుతిన్నారు. రుణాలు కూడా అనుకున్న స్థాయి కన్నా ఎక్కువగానే సేకరించుకోవడం గమనార్హం. సంవత్సరం మొత్తానికి అన్ని రుణాలు కలిపి రూ.49 వేల కోట్లు సేకరించాలని నిర్ణయించగా, ఇప్పటికే రూ.69,716 కోట్లు సేకరించారు. రుణాల రూపేణా సేకరించిన మొత్తమే లోటుగా చూపిస్తున్నారు.

ఏటా లక్ష కోట్ల రుణాలు ఖాయంగా తీసుకుంటున్నారు. అప్పుల కోసమే ఆదాయంలో సగానికిపైగా కట్టాల్సి వస్తోంది. ఆర్బీఐకి చాలా అప్పుల వివరాలు ఇవ్వడం లేదన్న ఆరోపణలు ఉన్నాయి.