వైసీపీ ద్వితీయ శ్రేణి నాయకులు టీడీపీలోకి పెద్ద ఎత్తున క్యూ కడుతున్నారు. అందరూ చంద్రబాబు, లోకేష్ సమక్షంలోనే కాదు..ఎవరు అందుబాటులో ఉంటే వారి సమక్షంలో చేరిపోతున్నారు. గుంటూరు జిల్లాలో వైసీపీ గట్టిపోటీ ఇస్తుందని భావిస్తున్న నియోజకవర్గం గుంటూరు తూర్పు. అక్కడ నుంచి ఇటీవలి కాలంలో వైసీపీ ముఖ్యనేతలంతా టీడీపీలో చేరిపోయారు. మాజీ ఎమ్మెల్యే నంబూరు సుభాని, డిప్యూటీ మేయర్ సజీల, ఆమె తండ్రి షౌకత్ సహా పలువురు నేతలు చేరిపోయారు. వీరంతా వైసీపీ కి గట్టిగా పని చేసిన వారే.
సిక్కోలు నుంచి చిత్తూరు వరకూ నియోజకవర్గ స్థాయిలో పెద్ద ఎత్తున చేరికలు జరుగుతున్నాయి. ప్రభుత్వం మారుతుందన్న క్లారిటీ రావడంతో ముందస్తుగానే చాలా మంది కండువాలు కప్పుకుంటున్నారు. ఎన్నికల్లో టీడీపీకి వ్యతిరేకంగా పని చేసిన తర్వాత.. తమను పార్టీలో చేర్చుకుంటారన్న క్లారిటీ లేకపోవడం… గత ప్రభుత్వం అనుసరించిన విధానాల వల్ల.. తమపైనా క్షేత్ర స్థాయిలో వేధింపులు ఉంటే తట్టుకోలేమన్న భావనతో చాలా మంది ముందుగానే సర్దుకుంటున్నారు.
కొన్ని నియోజకవర్గాల్లో ఎమ్మెల్యే అభ్యర్థులతో తిరుగుతున్న నేతలు టీడీపీ అభ్యర్థికి టచ్ లోకి వచ్చి.. పార్టీ మారకపోయినా మీ కోసమే పని చేస్తానని హమీలు ఇస్తున్నారు. ఈ చేరికల దెబ్బకు వైసీపీ నేతలు కూడా కొత్త ప్లాన్ వేస్తున్నారు. తమ పార్టీలోనూ చేరికలు ఉన్నాయని చెప్పుకునేందుకు ఇటీవలి వరకూ రోజుకు పది మంది వరకూ జగన్ దగ్గరకు తీసుకెళ్లి కండువా కప్పించేవాళ్లు. వారెవరో చాలా మందికి తెలియదు.
