‘రేయ్’ సినిమా తర్వాత దర్శకుడు వైవీఎస్ చౌదరి నుంచి మరో సినిమా రాలేదు. దాదాపు ఎనిమిదేళ్ళు గ్యాప్ వచ్చింది. ఇప్పుడాయన మళ్ళీ మెగాఫోన్ పడుతున్నారు. దాదాపు అందరూ కొత్తనటులతో ఒక న్యూ ఏజ్ సబ్జెక్ట్ ని పట్టాలెక్కించబోతున్నారు. దీనికి కోసం ఆడిషన్స్ జరగబోతున్నాయి.
కొత్తవారితో సినిమా చేయడంలో వైవీఎస్ చౌదరికి మంచి ట్రాక్ రికార్డ్ వుంది. ఆయన తొలి సినిమా ‘శ్రీ సీతారాముల కళ్యాణం చూతుము రారండి’ కొత్తవారితో చేసిన సినిమానే. అందులో ఏఎన్ఆర్ తప్పితే ప్రధాన తారాగణం అంతా నూతననటీనటులే. వెంకట్, చాందినీ, శివాజీ ఇలా చాలా మంది ఈ సినిమాతోనే పరిచయం అయ్యారు.
ఇప్పుడు మరోసారి ఇలాంటి కొత్త తరహ సినిమా చేయబోతున్నారు. సాంకేతికంగా మాత్రం చాలా అనుభవం వున్న టెక్నిషియన్స్ పని చేయబోతున్నారు. ఎంఎం కీరవాణి ఈ సినిమా మ్యూజిక్ అందిస్తారు. వైవీఎస్ చౌదరి, కీరవాణి కలయికలో వచ్చిన సినిమాలు మ్యూజికల్ హిట్స్ గా నిలిచాయి. ఇప్పుడు చేయబోయే కొత్త సినిమాలో కూడా మ్యూజిక్ కి ప్రాధాన్యత వుంటుంది. త్వరలోనే ఈ చిత్రానికి సంబధించిన అధికారిక ప్రకటన వెలువడనుంది.
